ଅହମଦାବାଦ୍,୨୪।୨: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ସୋମବାର ଅହମଦାବାଦ୍ରେ ନମସ୍ତେ ଟ୍ରମ୍ପ୍ କାର୍ଯ୍ୟକ୍ରମରେ ଯୋଗ ଦେଇଛନ୍ତି। ଏହି କାର୍ଯ୍ୟକ୍ରମ ଆମେରିକା ରାଷ୍ଟ୍ରପତି ନିର୍ବାଚନ ପୂର୍ବରୁ ଅନୁଷ୍ଠିତ ହୋଇଛି। ଏଠି ହୁଏତ ପ୍ରଶ୍ନ ଉଠିପାରେ ଭାରତର ଅନ୍ୟ କୌଣସି ସ୍ଥାନରେ ଏହି କାର୍ଯ୍ୟକ୍ରମ ଅୟୋଜନ କରା ନ ଯାଇ ଅହମଦାବାଦ୍ରେ କାହିଁକି କରାଗଲା। ଗୁଜରାଟର ଅଧିକ ଲୋକ ପ୍ରବାସୀ ଭାରତୀୟ ଭାବେ ଆମେରିକାରେ ବାସ କରୁଛନ୍ତି। ଆମେରିକା ନିର୍ବାଚନରେ ସେମାନଙ୍କର ସକାରାତ୍ମକ ପ୍ରଭାବ ସୃଷ୍ଟି ଉଦ୍ଦେଶ୍ୟରେ ଟ୍ରମ୍ପ୍ ଏହି କାର୍ଯ୍ୟକ୍ରମରେ ଯୋଗ ଦେଇଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରବାସୀ ଭାରତୀୟଙ୍କ ସହାୟତା ଲୋଡ଼ିବା ପାଇଁ ହାଓ୍ବଡ଼ି ମୋଦି କାର୍ଯ୍ୟକ୍ରମରେ ଯୋଗଦେଇଥିଲେ। ଏହା ବେଶ୍ ସଫଳ ମଧ୍ୟ ରହିଥିଲା। ତେବେ ହାଓ୍ବଡ଼ି ମୋଦି କାର୍ଯ୍ୟକ୍ରମର ସଫଳତା ଭଳି ନମସ୍ତେ ଟ୍ରମ୍ପ୍ ଦ୍ୱାରା ପୁଣିଥରେ ଟ୍ରମ୍ପ୍ ରାଷ୍ଟ୍ରପତି ନିର୍ବାଚନରେ କ୍ଷମତା ଦଖଲ କରି ପାରିବେ ନା ନାହିଁ ସେ ନେଇ ଚର୍ଚ୍ଚା ଜାରି ରହିଛି। ଆମେରିକାରେ ଟ୍ରମ୍ପ୍ଙ୍କ ସ୍ଥିତି ଭଲ ନ ଥିବାବେଳେ ତାଙ୍କ ବିରୋଧରେ ମହାଭିଯୋଗ ମଧ୍ୟ ଅଣାଯାଇଛି। ସେ ନମସ୍ତେ ଟ୍ରମ୍ପ୍ କାର୍ଯ୍ୟକ୍ରମ ଦ୍ୱାରା କେତେ ଲାଭାନ୍ବିତ ହେବେ ସେନେଇ ନାନା କଳ୍ପନା ଜଳ୍ପନା ପ୍ରକାଶ ପାଇଛି।
