ଦୁବାଇ,୧୬ା୯: ସୌଦି ଆରବର ଦୁଇଟି ତୈଳ ପ୍ରକଳ୍ପ ଉପରେ ଡ୍ରୋନ୍ ଆକ୍ରମଣ ପଛରେ ଇରାନ୍ର ହାତ ରହିଛି ବୋଲି ଆମେରିକା ଅଭିଯୋଗ କରିଥିବାବେଳେ ତେହେରାନ ଏହାକୁ ଖଣ୍ଡନ କରିଛି। ଅନ୍ୟପକ୍ଷରେ ଯୁଦ୍ଧ ପାଇଁ ଇରାନ ଧମକ ଦେଇଛି। ଉପସାଗରୀୟ ଅଞ୍ଚଳରେ ଆମେରିକା ବେସ୍ ଓ ବିମାନବାହୀ ଯୁଦ୍ଧଜାହାଜ ଏହାର ମିସାଇଲ ରେଞ୍ଜ୍ ପରିସରରେ ରହିଥିବା ତେହେରାନ୍ ପକ୍ଷରୁ କୁହାଯାଇଛି।
ଶନିବାର ୟେମେନ ବିଦ୍ରୋହୀ ହୁଥି ସଂଗଠନ ସୌଦି ଆରବର ତୈଳ କ୍ଷେତ୍ର ଓ ତୈଳ ପ୍ରକ୍ରିୟାକରଣ ପ୍ଲାଣ୍ଟ ଉପରେ ଡ୍ରୋନ୍ ଆକ୍ରମଣ କରିଥିବା ଦାବି କରିଥିଲା। ଏହି ସଂଗଠନକୁ ଇରାନ ସହାୟତା ଦେଉଛି। ଡ୍ରୋନ୍ ଆକ୍ରମଣ ଯୋଗୁ ସୌଦିର ତୈଳ ଯୋଗାଣ ଗୁରୁତର ବାଧାପ୍ରାପ୍ତ ହୋଇଛି। ବିଶ୍ୱର ତୈଳ ଯୋଗାଣକୁ ପ୍ରଭାବିତ କରିବା ଏହି ଆକ୍ରମଣର ଉଦ୍ଦେଶ୍ୟ ଓ ଏହା ପଛରେ ଇରାନର ହାତ ରହିଛି ବୋଲି ଆମେରିକା ପରରାଷ୍ଟ୍ର ସଚିବ ମାଇକ୍ ପମ୍ପେଓ ଅଭିଯୋଗ କରିଥିଲେ। ଆକ୍ରମଣ ଯୋଗୁ ତୈଳ ଦର ବ୍ୟାରେଲ ପିଛା ୩ରୁ ୫ ଡଲାର ବୃଦ୍ଧି ପାଇବା ଆଶଙ୍କା କରାଯାଉଛି। ଅନ୍ୟପକ୍ଷରେ ଆମେରିକାର ଅଭିଯୋଗକୁ ଇରାନ ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ଆବ୍ବାସ୍ ମୌସସାଭି ଖଣ୍ଡନ କରିଛନ୍ତି। ଆମେରିକା ଅଭିଯୋଗ ଭିତ୍ତିହୀନ ବୋଲି ସେ କହିଛନ୍ତି। ପୂରା ଦମ୍ରେ ଯୁଦ୍ଧ ପାଇଁ ଇରାନ ପ୍ରସ୍ତୁତ ବୋଲି ରିଭଲ୍ୟୁଶନାରୀ ଗାର୍ଡସ୍ର ଜଣେ ବରିଷ୍ଠ କମାଣ୍ଡର କହିଛନ୍ତି।
