ଓ୍ବାଶିଂଟନ,୧୭-୫: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଚାଇନାର ଟେଲିକମ୍ କମ୍ପାନୀ ହୁଏଇ ଓ ଏହାର ସହଯୋଗୀ କମ୍ପାନୀଗୁଡ଼ିକୁ ବ୍ୟାନ କରିଦେଇଛନ୍ତି। ଏଣିକି ରାଷ୍ଟ୍ରୀୟ ସୁରକ୍ଷା ହିତରେ ବିଦେଶରେ ନିର୍ମିତ ଟେଲିକମ୍ ଉପକରଣ ବ୍ୟବହାର ନ କରିବା ଲାଗି ଆମେରିକା କମ୍ପାନୀଗୁଡ଼ିକୁ ପରାମର୍ଶ ଦିଆଯାଇଛି। ଏହାଦ୍ୱାରା ଆମେରିକା ଓ ଚାଇନା ମଧ୍ୟରେ ବାଣିଜ୍ୟ ଯୁଦ୍ଧ ଆହୁରି ଗଭୀର ହେବ ବୋଲି କୁହାଯାଉଛି। ରାଷ୍ଟ୍ରପତି ଟ୍ରମ୍ପ ଏ ସମ୍ପର୍କରେ ଆଗତ ଏକ ଆଦେଶରେ ସ୍ବାକ୍ଷର କରିଛନ୍ତି। ଏହି ଆଦେଶରେ କୌଣସି ଦେଶର ଅଥବା କମ୍ପାନୀ ସମ୍ପର୍କରେ ସ୍ପଷ୍ଟ ରୂପେ ଉଲ୍ଲେଖ କରାଯାଇ ନ ଥିଲେ ହେଁ ସୁରକ୍ଷା ଦୃଷ୍ଟିରୁ ହୁଏଇ ଆମେରିକା ପାଇଁ ବିପଦ ବୋଲି ଆମେରିକା ଅଧିକାରୀଗଣ ପ୍ରକାଶ କରିସାରିଛନ୍ତି। ହୁଏଇଠାରୁ ୫ଜି ଟେଲିକମ୍ ପ୍ରଯୁକ୍ତି ନ କିଣିବା ଲାଗି ଆମେରିକା ଏହାର ସହଯୋଗୀ ଦେଶଗୁଡ଼ିକୁ ପରାମର୍ଶ ଦେଇଛି। ଟ୍ରମ୍ପଙ୍କ ଉକ୍ତ ନିଷ୍ପତ୍ତି ପରେ ଆମେରିକାର ପ୍ରଯୁକ୍ତି କିଣିବା ଲାଗି ଏଣିକି ହୁଏଇକୁ ପ୍ରାକ୍ ଲାଇସେନ୍ସ ନେବାକୁ ହେବ। ଖୁବଶୀଘ୍ର ହୁଏଇ ଓ ଏହାର ସହଯୋଗୀ କମ୍ପାନୀଗୁଡ଼ିକୁ କଳାତାଲିକାଭୁକ୍ତ କରାଯିବ ବୋଲି ଆମେରିକା ବାଣିଜ୍ୟ ବିଭାଗର ଉଦ୍ୟୋଗ ଏବଂ ସୁରକ୍ଷା ବ୍ୟୁରୋ ପ୍ରକାଶ କରିଛି।
