ଭୁବନେଶ୍ୱର,୧୧ା୨(ବ୍ୟୁରୋ): ଗୋଲ୍ଡେନ୍ ଟ୍ରାଇଙ୍ଗଲ୍ ଚାରିଟେବୁଲ୍ ଟ୍ରଷ୍ଟ ପକ୍ଷରୁ ଗୋଲ୍ଡେନ୍ ଟ୍ରାଇଙ୍ଗଲ୍ ଇଣ୍ଟରନ୍ୟାଶନାଲ ଫିଲ୍ମ ଫେଷ୍ଟିଭାଲର ପଞ୍ଚମ ସଂସ୍କରଣ ସୋମବାର ସୂଚନା ଭବନଠାରେ ଉଦ୍ଘାଟିତ ହୋଇଯାଇଛି। ୩ଦିନ ଧରି ଚାଲିବାକୁ ଥିବା ଏହି ଚଳଚ୍ଚିତ୍ର ଉତ୍ସବରେ ରାଜ୍ୟ ଉଚ୍ଚଶିକ୍ଷା ମନ୍ତ୍ରୀ ଅରୁଣ କୁମାର ସାହୁ ଯୋଗଦେଇ ଏହାକୁ ଆନୁଷ୍ଠାନିକଭାବେ ଉଦ୍ଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ ପୂର୍ବତନ ଏମ୍ପି ପ୍ରସନ୍ନ ପାଟଶାଣୀ, କାନାଡାର ଫିଲ୍ମମେକର ଆଲ୍ସନ ରିଚାର୍ଡସ ଏବଂ ଇଟାଲୀର ଫିଲ୍ମ ଜର୍ନାଲିଷ୍ଟ ସିଞ୍ଜିଆ ଘିଆନୀ ପ୍ରମୁଖ ଉପସ୍ଥିତ ଥିଲେ। ଚଳିତବର୍ଷ ଉତ୍ସବରେ ଭାରତର ବିଭିନ୍ନ ରାଜ୍ୟ ସମେତ, ଚାଇନା, ଇରାନ, ଇଟାଲୀ ଏବଂ ରୁଷିଆ ଭଳି ରାଷ୍ଟ୍ରରୁ ଆସିଥିବା ମୋଟ ୩୭ଟି ଫିଲ୍ମ ପ୍ରଦର୍ଶିତ ହେବ। ଉଦ୍ଘାଟନୀ ଦିବସରେ ବିଭିନ୍ନ ଭାଷାର ୧୦ଟି ଚଳଚ୍ଚିତ୍ର ପ୍ରଦର୍ଶିତ ହୋଇଥିବାବେଳେ ତେଲୁଗୁ ଫିଲ୍ମ ‘ଦି ଡେଥ୍ ସେଣ୍ଟେନ୍ସ’ ପ୍ରଦର୍ଶନରୁ ଉତ୍ସବ ଆରମ୍ଭ ହୋଇଥିଲା। ରଙ୍ଗନାଥ ସ୍ବାମୀଙ୍କ ଦ୍ୱାରା ନିର୍ଦ୍ଦେଶିତ ଏହି ଫିଲ୍ମରେ ଜଣେ ହ୍ୟାଙ୍ଗ୍ମ୍ୟାନ୍ଙ୍କ କାହାଣୀ ଦେଖିବାକୁ ମିଳିଥିଲା। ଏହାବ୍ୟତୀତ ଫିଲ୍ମ ‘ଉଡ଼ା’, ‘ଲଞ୍ଚ୍ ବ୍ରେକ୍’, ‘ଡିଟେକ୍ଟିଭ୍ ଚାଇନାଟାଉନ୍’, ‘ଏ ଗିଫ୍ଟ ଫର୍ ଏ ଗ୍ଲୁମି ଡେ’, ‘କିଙ୍ଗ୍ ଅଫ୍ ଡ୍ୟାମେଜେସ୍’, ‘ଡିୟର ଡେଥ୍’ ଫିଲ୍ମ ଉଦ୍ଘାଟନୀ ଦିବସରେ ପ୍ରଦର୍ଶିତ ହୋଇଥିଲା। ସେହିଭଳି ଓଡ଼ିଆ ଫିଲ୍ମ ‘କଥା’ ଏବଂ ‘ମହା ନାଟକ’ ଉତ୍ସବର ପ୍ରଥମ ଦିନରେ ଅନ୍ୟତମ ଆକର୍ଷଣ ରହିଥିଲା।
କାର୍ଯ୍ୟକ୍ରମରେ ଗୋଲ୍ଡେନ୍ ଟ୍ରାଇଙ୍ଗଲ୍ ଇଣ୍ଟରନ୍ୟାଶନାଲ ଫିଲ୍ମ ଫେଷ୍ଟିଭାଲର ସଭାପତି ପ୍ରିୟରଞ୍ଜନ ସାହୁ ଯୋଗଦେଇ କହିଥିଲେ, ଚଳିତବର୍ଷ ଇଟାଲୀ ଏବଂ କାନାଡାରୁ ପ୍ରତିନିଧିମାନେ ଏହି ଫେଷ୍ଟିଭାଲରେ ଯୋଗଦେଇଛନ୍ତି। ପରିବେଶ ପ୍ରଦୂଷଣ ରୋକିବା ଏବଂ ଜୈବିକ ଇନ୍ଧନର କୁପରିଣାମ ସମ୍ପର୍କରେ ଫିଲ୍ମ ମାଧ୍ୟମରେ ଲୋକଙ୍କୁ ସଚେତନ କରିବା ଏହି ଫିଲ୍ମ ଫେଷ୍ଟିଭାଲର ମୁଖ୍ୟ ଉଦ୍ଦେଶ୍ୟ ବୋଲି ସେ କହିଥିଲେ। ଫେବୃୟାରୀ ୧୨ରେ ଶେଷ ହେବାକୁ ଥିବା ଉତ୍ସବରେ ବିଭିନ୍ନ ବିଭାଗରେ ଶ୍ରେଷ୍ଠ ଫିଲ୍ମ ଏବଂ କଳାକାରମାନଙ୍କୁ ପୁରସ୍କାର ପ୍ରଦାନ କରାଯିବ।
