ଭଦ୍ରକ ଅଫିସ, ୨୭।୯: ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ପରେ ଗୁରୁବାର ଭଦ୍ରକ ଜିଲା ଚିକିତ୍ସାଳୟରୁ ୪ ଦଲାଲଙ୍କୁ ଟାଉନ ଥାନା ପୋଲିସ ଗିରଫ କରିଥିଲା। ଶୁକ୍ରବାର ଏହି ଚିକିତ୍ସାଳୟରୁ ଅନ୍ୟ ଜଣେ ଦଲାଲଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଛି। ସେ ହେଲେ ପୌରାଞ୍ଚଳ ଅଧୀନ କୁଅଁାସ ଗ୍ରାମର ଲକ୍ଷ୍ମଣ ବେହେରା। ଏ ନେଇ ଥାନାରେ ଏକ ମାମଲା(ନଂ.୨୯୦/୧୯) ରୁଜୁ କରାଯାଇଛି। ସେହିଭଳି ଗ୍ରାମାଞ୍ଚଳ ଥାନା ପୋଲିସ ଆର୍ଟିଓରୁ ଜଣେ ଦଲାଲଙ୍କୁ ଗିରଫ କରି ଶୁକ୍ରବାର କୋର୍ଟ ଚାଲାଣ କରିଛି। ଗ୍ରାମାଞ୍ଚଳ ଥାନାଧିକାରୀ ପ୍ରଭାଂଶୁ ଶେଖର ମିଶ୍ରଙ୍କ ନେତୃତ୍ୱରେ ଶୁକ୍ରବାର ସକାଳେ ଏକ ଟିମ୍ ସାଦା ପୋଷାକରେ ଆର୍ଟିଓରେ ଘୂରି ବୁଲିବା ସମୟରେ ଏହି ଦଲାଲଙ୍କୁ ଧରିଥିଲା। ଗିରଫ ବ୍ୟକ୍ତି ଜଣଙ୍କ ହେଲେ ପୀରହାଟ ଅଞ୍ଚଳ ଖେଦରପୁର ଗ୍ରାମର ମୃତ୍ୟୁଞ୍ଜୟ ମହାନ୍ତି। ଏ ନେଇ ପୋଲିସ ମାମଲା(ନଂ. ୫୨୪/୧୯) ରୁଜୁ କରିଛି। ମୃତ୍ୟୁଞ୍ଜୟ ଆର୍ଟିଓକୁ ବିଭିନ୍ନ କାମ ପାଇଁ ଆସୁଥିବା ଲୋକଙ୍କୁ ପ୍ରବର୍ତ୍ତାଇ ସେମାନଙ୍କଠାରୁ ମୋଟା ଅଙ୍କର ଅର୍ଥ ନେଉଥିଲେ ବୋଲି ଅଭିଯୋଗ ହୋଇଛି।
