ଲଣ୍ଡନ, ୧୭ା୬ (ପି.ଟି.)- ବିଶ୍ୱର ଯେକୌଣସି କ୍ରିକେଟ ଦଳକୁ ଚ୍ୟାଲେଞ୍ଜ ଦେଇପାରିବ ବୋଲି କହିଛନ୍ତି ଆସିଷ୍ଟାଣ୍ଟ କୋଚ୍ ରୋଡି ଇଷ୍ଟଓ୍ବିକ୍। ଅତୀତରେ ଓ୍ବେଷ୍ଟଇଣ୍ଡିଜର ଦୁର୍ଦ୍ଧଷ ପେସ୍ ବାହିନୀ ପ୍ରତିଷ୍ଠା ଅର୍ଜନ କରିଥିଲା। ଏହାର ମୁଖ୍ୟ କାରଣ ହେଲା ଦଳ ଫିଟ୍ନେସ୍କୁ ଗୁରୁତ୍ୱ ଦେଇଥାଏ। ୭୦ ଓ ୮୦ ଦଶକରେ ଓ୍ବେଷ୍ଟଇଣ୍ଡିଜ ପେସ୍ ବାହିନୀ ବିଶେଷ ସଫଳତା ହାସଲ କରିଥିଲା। କିନ୍ତୁ ଏବେକାର ବୋଲରମାନେ ସେମାନଙ୍କର ବ୍ୟକ୍ତିଗତ ପରିଚୟ ସୃଷ୍ଟି କରିବାକୁ ଚେଷ୍ଟା କରୁଛନ୍ତି। ଆମ ଦଳରେ କେମର ରୋଚ୍, ଶାନନ ଗାବ୍ରିଏଲ୍, ଅଲ୍ଜାରି ଯୋଶେଫ୍ ଏବଂ ଅଧିନାୟକ ଜାସନ ହୋଲ୍ଡର ରହିଛନ୍ତି। ସାଉଥାମ୍ପଟନରେ ଜୁଲାଇ ୮ରୁ ଆରମ୍ଭ ହେବାକୁଥିବା ୩ ମ୍ୟାଚ ବିଶିଷ୍ଟ ଟେଷ୍ଟ ସିରିଜରେ ଇଂଲଣ୍ଡକୁ ଚ୍ୟାଲେଞ୍ଜ ଦେବା ଲାଗି ଆମ ଦଳ ପ୍ରସ୍ତୁତ। ଦୁଇ ଅଭିଜ୍ଞ ବୋଲର କେମର ଓ ଶାନନ୍ ବୋଲିଂ ଆକ୍ରମଣର ନେତୃତ୍ୱ ନେବେ। ଜାସନ ହୋଲ୍ଡର ଗତ ଦୁଇ ବର୍ଷ ହେଲା ଜଣେ ଉନ୍ନତ ଟେଷ୍ଟ ବୋଲର ଭାବେ ତାଙ୍କ ପ୍ରତିଭା ଦେଖାଇ ଆସୁଛନ୍ତି। ଅଲ୍ଜାରିଙ୍କ ଟେଷ୍ଟ କ୍ୟାରିୟର ଆରମ୍ଭ ମାତ୍ର। ଦକ୍ଷତା ପ୍ରତିପାଦନ ଦ୍ୱାରା ଦଳରେ ନିଜର ସ୍ଥିତିକୁ ସୁଦୃଢ କରିବା ଲାଗି ସେ ଚାହିଁବେ। ଏହି ୪ଜଣ ଫାଷ୍ଟ ବୋଲରଙ୍କୁ ନେଇ ଆମେ ବିଶ୍ୱର ଯେକୌଣସି ଦଳକୁ ଚ୍ୟାଲେଞ୍ଜ ଦେଇ ପାରିବୁ ବୋଲି ଇଷ୍ଟଓ୍ବିକ୍ କହିଛନ୍ତି। ଗତବର୍ଷ ଇଂଲଣ୍ଡ ବିପକ୍ଷରେ ଏହାର ଘରୋଇ ସିରିଜରେ ଇଂଲଣ୍ଡକୁ ପରାସ୍ତ କରି ଓ୍ବିଜ୍ଡେନ୍ ଟ୍ରଫି ହାତେଇଥିଲା। ରୋଚ୍ଙ୍କ ନେତୃତ୍ୱରେ ପେସ୍ ବାହିନୀ ଦଳକୁ ଜିତାଇବାରେ ବିଶେଷ ଭୂମିକା ଗ୍ରହଣ କରିଥିଲା।
