ପୁରୀ ଅଫିସ,୧୬।୬: ସନାତନ ପରମ୍ପରାରେ ଶାଳଗ୍ରାମଙ୍କୁ ସ୍ବୟଂ ବିଷ୍ଣୁଙ୍କ ସ୍ବରୂପ ଭାବେ ଉପାସନା କରାଯାଇଥାଏ। ବର୍ତ୍ତମାନ ପ୍ରକୃତ ଶାଳଗ୍ରାମ ପ୍ରାୟତଃ ଆଉ ମିଳୁନାହିଁ। ଶ୍ରୀମନ୍ଦିରରେ ଚିତ୍ରିତ ଶାଳଗ୍ରାମ ଉପାସନାର ପରମ୍ପରା ନ ଥିବାବେଳେ ହ୍ବାଟ୍ସଆପ୍ ଓ ଫେସ୍ବୁକ୍ ଭଳି ସୋସିଆଲ୍ ମିଡିଆରେ ଏହାକୁ ନେଇ ଭୁଲ୍ ସୂଚନା ଦିଆଯାଉଥିବା ଦେଖିବାକୁ ମିଳୁଛି। ଶାଳଗ୍ରାମ ପ୍ରତି ଓଡ଼ିଆଙ୍କ ରହିଥିବା ବିଶ୍ୱାସକୁ ଆଧାର କରି କେହି ଅଭିସନ୍ଧିମୂଳକ ଭାବେ ଏଭଳି ଭ୍ରମ ସୃଷ୍ଟି କରୁଛନ୍ତି ବୋଲି କୁହାଯାଉଛି।
ଐତିହ୍ୟ ବିଶାରଦ ଡ. ସୁରେନ୍ଦ୍ର କୁମାର ମିଶ୍ରଙ୍କ ମତରେ ଓଡ଼ିଶାରେ ତିନିପ୍ରକାର (କଳା, ଧଳା ଓ ଇଷତ୍ ଲାଲ) ଶାଳଗ୍ରାମ ପୂଜା କରାଯାଉଛି। ଏହି ଶାଳଗ୍ରାମ ଶିଳା ଗଣ୍ଡୁକି ନଦୀ କୂଳରୁ ମିଳିଥାଏ। ଗୋଲାକାର ଶାଳଗ୍ରାମଙ୍କୁ ପୂଜା କଲେ ଲକ୍ଷ୍ମୀପ୍ରାପ୍ତି ହୁଅନ୍ତି ବୋଲି ବିଶ୍ୱାସ ରହିଛି। ତେଣୁ ଏହାଙ୍କୁ ସାଧାରଣତଃ ଘର ଏବଂ ମନ୍ଦିରରେ ପୂଜା କରାଯାଏ। କଥିତ ଅଛି ମହାରାଜା ଇନ୍ଦ୍ରଦ୍ୟୁମ୍ନ ଶ୍ରୀମନ୍ଦିର ରତ୍ନବେଦୀ ଚତୁଃପାର୍ଶ୍ୱରେ ୧ଲକ୍ଷ ୮ମୂର୍ତ୍ତି ଶାଳଗ୍ରାମ ପୋତିଥିଲେ। ସେଥିପାଇଁ କେତେକ ନୀତି ସମୟରେ ରତ୍ନସିଂହାସନ ଚାରିପଟେ ମହାପ୍ରଭୁଙ୍କ ଚଳନ୍ତି ପ୍ରତିମାମାନଙ୍କୁ ପରିକ୍ରମା କରାଯାଏ।ଶ୍ରୀମନ୍ଦିରରେ ବହୁ ପ୍ରାଚୀନ କାଳରୁ ବାହାର ବେଢା ଏବଂ ଭିତର ବେଢାରେ ଶାଳଗ୍ରାମ ପୂଜାବିଧି ପ୍ରାୟତଃ ନାହିଁ। ଶାଳଗ୍ରାମ ଉପରେ ଚିତ୍ର ହେବାର ବିଧି ମଧ୍ୟ ଓଡ଼ିଶାରେ ଦେଖାଯାଏ ନାହିଁ। ବର୍ତ୍ତମାନ ସୋସିଆଲ ମିଡିଆରେ ଦୃଶ୍ୟ ହେଉଥିବା ଶାଳଗ୍ରାମ ଓଡ଼ିଶାର ପରମ୍ପରା ନୁହେଁ। ଶ୍ରୀମନ୍ଦିରରେ ଏଭଳି ଶାଳଗ୍ରାମ ଉପାସିତ ହେଉ ନାହାନ୍ତି। ତେଣୁ ଶ୍ରୀମନ୍ଦିରରେ ଚିତ୍ରିତ ଶାଳଗ୍ରାମକୁ ନେଇ ଯେଉଁ ଫଟୋ ଏବେ ସୋସିଆଲ ମିଡିଆରେ ବୁଲୁଛି ସେନେଇ କୌଣସି ସତ୍ୟତା ନାହିଁ ବୋଲି ମିଶ୍ର କହିଛନ୍ତି।
