ନୂଆଦିଲ୍ଲୀ,୧।୧୧(ପି.ଟି.)- ଇଂଲଣ୍ଡରେ ଅନୁଷ୍ଠିତ ବିଶ୍ୱକପ୍ବେଳେ ଭାରତୀୟ ଦଳର ଅଧିନାୟକ ବିରାଟ କୋହଲିଙ୍କ ସ୍ତ୍ରୀ ଅନୁଷ୍କା ଶର୍ମାଙ୍କୁ ଚୟନକର୍ତ୍ତା ଚା’ ପରଷି ଥିବା ଭଳି ଗୁରୁତର ଅଭିଯୋଗ ଆଣିଛନ୍ତି ପୂର୍ବତନ ଉଇକେଟକିପର ଫାରୁକ୍ ଇଞ୍ଜିନିୟର। ବଲିଉଡ ଅଭିନେତ୍ରୀ ଅନୁଷ୍କା ଏହାକୁ ଖଣ୍ଡନ କରିବା ସହ ଖରାପ ମନୋଭାବ ରଖି ମିଛ କୁହାଯାଇଥିବା କହିଛନ୍ତି। ୮୨ ବର୍ଷୀୟ ଇଞ୍ଜିନିୟର ଏକ ଖବରକାଗଜକୁ ସାକ୍ଷାତ୍କାର ଦେଇ ୫ ଜଣିଆ ଜାତୀୟ ଚୟନ କମିଟିକୁ ଉପହାସ କରିଛନ୍ତି। ଏମ୍ଏସକେ ପ୍ରସାଦଙ୍କ ନେତୃତ୍ୱାଧୀନ କମିଟିରେ ସରନ୍ଦୀପ ସିଂ, ଯତୀନ ପରଞ୍ଜପେ, ଗଗନ ଖୋଡା ଓ ଦବଙ୍ଗ ଗାନ୍ଧୀ ସଦସ୍ୟ ରହିଛନ୍ତି। ଦେଶ ପାଇଁ ୪୬ ଟେଷ୍ଟ ଖେଳିଥିବା ପୂର୍ବତନ କ୍ରିକେଟର ଦାବି କରିଛନ୍ତି, ୫ ଜଣିଆ କମିଟିର ଜଣେ ସଦସ୍ୟ ଇଂଲଣ୍ଡରେ ଖେଳାଯାଇଥିବା ବିଶ୍ୱକପ୍ବେଳେ ଅନୁଷ୍କାଙ୍କୁ ଚା’ ଦେଇଥିବା ଦେଖିଛନ୍ତି। ତେବେ ଉକ୍ତ ଚୟନକର୍ତ୍ତାଙ୍କ ନାମ ପ୍ରକାଶ କରିନାହାନ୍ତି। ବିଶ୍ୱକପ୍ବେଳେ କୌଣସି ଚୟନକର୍ତ୍ତା ବକ୍ସରେ ବସି ନ ଥିଲେ। ହେଲେ ସେଠାରେ ଭାରତୀୟ ଅଧିନାୟକଙ୍କ ପତ୍ନୀ ବସିଥିଲେ। ଏହାକୁ ବେକାର ଓ ଦୁର୍ବ୍ୟବହାରପୂର୍ଣ୍ଣ କଥା ବୋଲି ଚୟନ କମିଟିର ଜଣେ ସଦସ୍ୟ କହିଛନ୍ତି। ଅନ୍ୟପକ୍ଷରେ ଅନୁଷ୍କା ଭାରତୀୟ କ୍ରିକେଟ ସମ୍ପର୍କିତ ବିବାଦ ମଧ୍ୟକୁ ତାଙ୍କ ନାମକୁ ନ ଟାଣିବା ପାଇଁ କହିଛନ୍ତି। ବିଶ୍ୱକପ୍ର କେବଳ ଗୋଟିଏ ମ୍ୟାଚ୍ ମୁଁ ଦେଖିଥିଲି। ତାହା ପୁଣି ଫ୍ୟାମିଲି ବକ୍ସରେ ବସିଥିଲି ଓ ମୁଁ ଚୟନକର୍ତ୍ତାଙ୍କ ବକ୍ସକୁ ଯାଇ ନାହିଁ। ଯଦି କାହାର ଚୟନକର୍ତ୍ତାଙ୍କ ଯୋଗ୍ୟତା ସମ୍ପର୍କରେ କମେଣ୍ଟ କରିବାର ଅଛି, ସେ କରିପାରନ୍ତି। ଏହା ବ୍ୟକ୍ତିଗତ ମତାମତ। ମାତ୍ର ମୋ ନାମକୁ ବ୍ୟବହାର କରି ମତାମତକୁ ଅତିରଞ୍ଜିତ କରାଯାଉଛି। ଏଭଳି ବିବାଦକୁ ମୋତେ ଟାଣିବାକୁ ମୁଁ କାହାରିକୁ ଅନୁମତି ଦେଇ ନାହିଁ ବୋଲି ଅନୁଷ୍କା କହିଛନ୍ତି।
