ଜଗତ୍ସିଂହପୁର ଅଫିସ,୨ା୩: ଇଞ୍ଜିନିୟରିଂ ଛାତ୍ରୀଙ୍କୁ ବ୍ଲାକମେଲିଂ କରିବାକୁ ଉଦ୍ୟମ କରି ରବିବାର ଜଣେ ଯୁବକ ଗିରଫ ହେବା ସହ କୋର୍ଟ ଚାଲାଣ ହୋଇଛନ୍ତି। ସେ ହେଲେ ଜଗତ୍ସିଂହପୁର ଥାନା ଅନ୍ତର୍ଗତ ଧୂଆଁପାରିର ହିରଣ୍ମୟ ବାରିକ ଓରଫ ଶଙ୍କର। ପୋଲିସ ସୂଚନା ଅନୁଯାୟୀ ଶଙ୍କର ସଅଁରା ଛକରେ ଏକ ଷ୍ଟୁଡିଓ କରିଛନ୍ତି। ଇଞ୍ଜିନିୟରିଂ ଛାତ୍ରୀଙ୍କୁ ସେ ଜାଣିଛନ୍ତି। ତେଣୁ ପ୍ରଥମେ ଛାତ୍ରୀଙ୍କୁ ପ୍ରେମ ଜାଲରେ ଛନ୍ଦିବା ପାଇଁ ଉଦ୍ୟମ କରି ବିଫଳ ହେବାରୁ ବଦନାମ କରିବା ପାଇଁ ଚେଷ୍ଟା କରିଥିଲେ। ଫେସବୁକ୍ ଆକାଉଣ୍ଟରୁ ଛାତ୍ରୀଙ୍କ ଫଟୋ ନେଇ ତାହାକୁ ଅଶ୍ଳୀଳ ଫଟୋ ସହ ଯୋଡିଥିଲେ। ପରେ ଏହି ଫଟୋ ଓ ଭିଡିଓକୁ ଜାନୁୟାରୀ ୨୨ରୁ ୨୫ ତାରିଖ ପର୍ଯ୍ୟନ୍ତ ଛାତ୍ରୀଙ୍କ ପାଖକୁ ପଠାଇ କଥାବାର୍ତ୍ତା ହେବା ପାଇଁ ଦାବି କରିଥିଲେ। ଏଭଳି ଅଶ୍ଳୀଳ ନକଲି ଫଟୋ ଦେଖି ଛାତ୍ରୀ ଜଣକ ତାଙ୍କୁ ଗାଳିଗୁଲଜ କରିଥିଲେ। ହେଲେ ଶଙ୍କରଙ୍କ ଚରିତ୍ରରେ କୌଣସି ପରିବର୍ତ୍ତନ ଆସି ନ ଥିଲା। ବାରମ୍ବାର ଏଭଳି କରିବାରୁ ଗତ ଜାନୁୟାରୀ ୨୯ରେ ଶଙ୍କରଙ୍କ ବିରୋଧରେ ଥାନାରେ ଅଭିଯୋଗ ହୋଇଥିଲା। ଛାତ୍ରୀଙ୍କ ଅଭିଯୋଗକ୍ରମେ ପୋଲିସ ମାମଲା ସଂଖ୍ୟା ୩୮/୨୦ ରୁଜୁ କରି ତଦନ୍ତ ଚଳାଇଥିଲା।
