ଭୁବନେଶ୍ୱର, ୨୮।୧୨(ସ୍ପୋଟର୍ସ ବ୍ୟୁରୋ)- ଓଡ଼ିଶା ଏଫ୍ସି ଘରୋଇ ଗ୍ରାଉଣ୍ଡ କଳିଙ୍ଗ ଷ୍ଟାଡିୟମରେ ବିଜୟରୁ ଅଭିଯାନ ଆରମ୍ଭ କରିଛି। ଶୁକ୍ରବାର ଏଠାରେ ଖେଳାଯାଇଥିବା ସଂଘର୍ଷପୂର୍ଣ୍ଣ ମ୍ୟାଚ୍ରେ ତାରକା ଷ୍ଟ୍ରାଇକର ଆରିଡେନ ଜେସସ୍ କାବେରା ସାନ୍ତାନାଙ୍କ ଡବଲ୍ ଗୋଲ ସହାୟତାରେ ଭ୍ରମଣକାରୀ ଜାମସେଦପୁର ଏଫ୍ସିକୁ ୨-୧ ଗୋଲରେ ପରାସ୍ତ କରିଛି। ଏହି ବିଜୟ ସହ ଓଡ଼ିଶା ଲିଗ୍ରେ ଏପର୍ଯ୍ୟନ୍ତ ୧୦ଟି ମ୍ୟାଚ୍ ଖେଳି ୩ ବିଜୟ, ୩ ଡ୍ର ଓ ୪ ପରାଜୟ ସହ ମୋଟ ୧୨ ପଏଣ୍ଟ ହାସଲ କରି ତାଲିକାର ଷଷ୍ଠ ସ୍ଥାନରେ ରହିଛି। ଅନ୍ୟପଟେ ଜାମସେଦପୁର ସମାନ ସଂଖ୍ୟକ ମ୍ୟାଚ ଖେଳି ୩ ବିଜୟ, ୪ ଡ୍ର ଓ ୩ ପରାଜୟ ସହ ୧୩ ପଏଣ୍ଟ ହାସଲ କରି ତାଲିକାର ଚତୁର୍ଥ ସ୍ଥାନରେ ରହିଛି। ଗତ ୫ଟି ମ୍ୟାଚ୍ ଖେଳି ଜାମସେଦପୁର ଗୋଟିଏ ହେଲେ ବି ବିଜୟ ହାସଲ କରିପାରି ନ ଥିଲା। ଓଡ଼ିଶା ତା’ର ପରବର୍ତ୍ତୀ ମ୍ୟାଚ୍ରେ ସୋମବାର କଳିଙ୍ଗ ଷ୍ଟାଡିୟମରେ ଚେନ୍ନାଇନ୍ ଏଫ୍ସି କୁ ଭେଟିବ। ସେହିପରି ଜାମସେଦପୁର ତା’ର ପରବର୍ତ୍ତୀ ମ୍ୟାଚ୍ରେ ଗୁରୁବାର ନର୍ଥ ଇଷ୍ଟ ୟୁନାଇଟେଡକୁ ଭେଟିବ।
ମ୍ୟାଚ୍ରେ ଓଡ଼ିଶା ଆଧିପତ୍ୟ ବିସ୍ତାର କରି ଖେଳିଥିଲା ଓ ଘରୋଇ ଦର୍ଶକଙ୍କୁ ନିରାଶ କରି ନ ଥିଲା। ଦଳ ତରଫରୁ ସାନ୍ତାନା ୨୮ ଓ ୪୫ତମ ମିନିଟ୍ରେ ଗୋଲ ଦେଇଥିଲେ। ଅନ୍ୟପଟେ ୩୮ତମ ମିନିଟ୍ରେ ଜାମସେଦପୁର ତରଫରୁ ଡିଫେନ୍ସିଭ ମିଡଫିଲ୍ଡର ଏଇଟୋର ମୋନୋରଏ ପେନାଲ୍ଟି କିକ୍ ଜରିଆରେ ଗୋଟିଏ ଗୋଲ ଦେଇଥିଲେ। ମ୍ୟାଚ୍ ୧-୧ ସମାନ ସ୍ଥିତିରେ ପହଞ୍ଚିଥିଲା। ତେବେ ଶେଷରେ ସାନ୍ତାନା ଆଉ ଏକ ଗୋଲ ଦେଇ ଓଡ଼ିଶାକୁ ୨-୧ରେ ଅଗ୍ରଣୀ କରାଇଥିଲେ। ଚମତ୍କାର ପ୍ରଦର୍ଶନ ବଳରେ ସାନ୍ତାନା ଦ୍ୱିତୀୟ ଗୋଲ ସ୍କୋର କରିଥିଲେ। ଏହାପରେ ସୁଯୋଗ ପାଇଥିଲେ ମଧ୍ୟ ଉଭୟ ଦଳ ଗୋଲ ସ୍କୋର କରିପାରି ନ ଥିଲେ। ଫଳରେ ଶେଷରେ ଓଡ଼ିଶା ବିଜୟୀ ହୋଇଥିଲା। ଏହି ବିଜୟ ଓଡ଼ିଶା ପାଇଁ ବିଶେଷ ଭାବେ ମହତ୍ତ୍ୱ ରଖୁଛି।
ମ୍ୟାଚ୍ରେ ଏକାଧିକ ନାଟକୀୟ ମୋଡ଼ ଦେଖିବାକୁ ମିଳିଥିଲା। ଦୁଇ ଦଳର ଖେଳାଳି ବହୁବାର ମୁହଁାମୁହିଁ ହୋଇଥିଲେ। ବହୁବାର ପରସ୍ପରକୁ ଧକ୍କା ଦେଇଥିଲେ ଓ ଏଥିପାଇଁ ମ୍ୟାଚ୍ରେ ମଧ୍ୟ ବାଧା ସୃଷ୍ଟି ହୋଇଥିଲା। ପ୍ରଥମାର୍ଦ୍ଧରେ ଅଧିକ ସଂଘର୍ଷ ଦେଖିବାକୁ ମିଳିଥିଲା। ଉଭୟ ଦଳ ବେଶ୍ କେତେଗୁଡିଏ ସୁଯୋଗ ସୃଷ୍ଟି କରିଥିଲେ। ତେବେ ଦ୍ୱିତୀୟାର୍ଦ୍ଧରେ ମ୍ୟାଚ୍ର ରୋମାଞ୍ଚ କମ୍ ଥିଲା। କାରଣ ଦ୍ୱିତୀୟାର୍ଦ୍ଧରେ ଗୋଟିଏ ହେଲେ ବି ଗୋଲ ସ୍କୋର ହୋଇ ନ ଥିଲା। ଜାମସେଦପୁର କିନ୍ତୁ ଓଡ଼ିଶା ଅପେକ୍ଷା ବଲ୍କୁ ଅଧିକ ନିଜ ପାଖରେ ରଖିଥିଲା। ପାସ ଆକୁରେସିରେ ମଧ୍ୟ ଜାମସେଦପୁର ଓଡ଼ିଶାକୁ ପଛରେ ପକାଇଥିଲା। ଓଡ଼ିଶା ଖେଳାଳିମାନେ ୨୨ଟି ଓ ଜାମସେଦପୁର ୧୩ଟି ଫାଉଲ ମାରିଥିଲେ। ଓଡ଼ିଶା ଖେଳାଳିମାନେ ୫ଟି ଓ ଜାମସେଦପୁର ଖେଳାଳିମାନେ ଗୋଟିଏ ହଳଦିଆ କାର୍ଡ ପାଇଥିଲେ। ଜାମସେଦପୁରକୁ ୫ଟି କର୍ନର ମିଳିଥିବା ବେଳେ ଓଡ଼ିଶାକୁ କୌଣସି କର୍ନର ମିଳି ନ ଥିଲା। ଭ୍ରମଣକାରୀ ଦଳ କ୍ୱାଲିଟି ଖେଳ ପ୍ରଦର୍ଶନ କରିଥିଲେ ମଧ୍ୟ ବିଜୟୀ ହୋଇପାରି ନ ଥିଲା। ଘରୋଇ ଦର୍ଶକଙ୍କ ସମର୍ଥନ ଓଡ଼ିଶା ଖେଳାଳିଙ୍କୁ ବେଶ୍ ଉତ୍ସାହିତ କରିଥିଲା। ଓଡ଼ିଆ ଖେଳାଳି ଶୁଭମ ଷଡଙ୍ଗୀ ଘରୋଇ ଦଳ ତରଫରୁ ପଡିଆକୁ ଓହ୍ଲାଇଥିଲେ।
