ଭୁବନେଶ୍ୱର,୧୯।୭(ବ୍ୟୁରୋ) : ରାଜଧାନୀର ଫୁଟପାଥ୍ଗୁଡ଼ିକ ପଥଚାରୀ ଏବଂ ସାଇକେଲ ଚାଳକଙ୍କ ପାଇଁ ଉଦ୍ଦିଷ୍ଟ। କେହି ବି ଫୁଟପାଥ୍ ଉପରେ ଦୋକାନ କରି କିମ୍ବା ଗାଡ଼ି ପାର୍କିଂ କରି ତାହାକୁ ଜବରଦଖଲ କରିପାରିବେ ନାହିଁ। ଯିଏ ଜବରଦଖଲ କରିବେ ତାଙ୍କୁ ଭୁବନେଶ୍ୱର ମହାନଗର ନିଗମ (ବିଏମ୍ସି) ଓ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ(ବିଡିଏ)ର ଏନଫୋର୍ସମେଣ୍ଟ ଟିମ୍ ଉଚ୍ଛେଦ କରିବ ବୋଲି ବିଏମ୍ସି-ବିଡିଏ ପକ୍ଷରୁ ନିଷ୍ପତ୍ତି ନିଆଯାଇଥିଲା। ହେଲେ ଏହା କେବଳ ତୁଚ୍ଛା ଘୋଷଣା ବୋଲି ଏବେ ସହରରେ ଆଲୋଚନା ହେଉଛି। ଅଧିକାଂଶ ସ୍ଥାନରେ ଫୁଟ୍ପାଥ୍କୁ ଉଠାଦେକାନୀ କବ୍ଜା କରିଥିଲେ ମଧ୍ୟ ଏହା ଏନଫୋର୍ସମେଣ୍ଟ ଟିମ୍କୁ ଦେଖାଯାଉନାହିଁ। ଅନ୍ୟପଟେ ଏନଫୋର୍ସମେଣ୍ଟ ଟିମ୍ ବିଭିନ୍ନ ବସ୍ତି ଓ କ୍ଲବକୁ ଉଚ୍ଛେଦ କରିବାରେ ଲାଗିପଡ଼ିଛି। ମାତ୍ର ପ୍ରକୃତ ସମସ୍ୟା ପ୍ରତି ଆଖି ବୁଜି ଦେଇଛି।
ୟୁନିଟ-୧ ହାଟ ନିକଟ ଫୁଟ୍ପାଥ୍କୁ ଏବେ ସେଠାକାର ଫଳ ଦୋକାନୀ ଅଧା ମାଡ଼ି ବସିଥିବାବେଳେ ଆଉ ଅଧାକ ସ୍ଥାନରେ ବାଇକ୍ ପାର୍କିଂ ହେଉଛି। ସେହିପରି କେତେଜଣ ଉଠାବ୍ୟବସୀୟୀ ମଧ୍ୟ ଫୁଟ୍ପାଥ୍ ଉପରେ ପସରା ମେଲାଇଛନ୍ତି। କେହି ପଞ୍ଜୁରୀ ବିକୁଛି ତ ଆଉ କିଏ ରଶି। ସବୁ ସାମଗ୍ରୀ ଫୁଟପାଥ ଉପରେ ହିଁ ରହୁଛି। ତେଣୁ ପଥଚାରୀଙ୍କ ପାଇଁ ଜାଗା ନାହିଁ। ସେହିପରି ଭୁବନେଶ୍ୱର ମଧ୍ୟ ବିଧାୟକ ତଥା ପୂର୍ବତନ ମେୟର ଅନନ୍ତ ନାରାୟଣ ଜେନାଙ୍କ ଘର ସମ୍ମୁଖ ଫୁଟପାଥ୍ କଥା ନ କହିବା ଭଲ। ଏଠାରେ ଫୁଟପାଥ୍ ଓ ରାସ୍ତା ସବୁ ଜବରଦଖଲ। ୟୁନିଟ-୧ରେ ଚାରା ଏବଂ ବେଡଶିଟ୍ ବ୍ୟବସାୟୀଙ୍କ ଅକ୍ତିଆରରେ ଫୁଟପାଥ୍ ରହିଛି। କେତେକ ସ୍ଥାନରେ ଡ୍ରେନ୍ ଉପରେ ଠେଲାଗାଡ଼ିରେ ଟିଫିନ୍ ଷ୍ଟଲ ଖୋଲଯିବା ସହ ପରିବା ବେପାର ଚାଲିଛି। ଏଜିରୁ ରାଜମହଲ ଆସିବା ରାସ୍ତାରେ ବେଡ଼ସିଟ, ଗଦି, କସ୍ମେଟିକ୍ସ ଆଦି ବ୍ୟବସାୟୀମାନେ ଫୁଟପାଥକୁ ନିଜ ଘର କରିସାରିଲେଣି। ଫୁଟ୍ପାଥ୍ରେ ରୋଷେଇ କରିବାଠୁ ଆରମ୍ଭ କରି ରାତିରେ ଖଟିଆ ପକାଇ ଶୋଉଥିବା ଦେଖିବାକୁ ମିଳିଛି। ଦୁର୍ଘଟଣା ପ୍ରତି ବି ସେମାନଙ୍କର ଭୟ ନାହିଁ। ବାରମ୍ବାର ଉଚ୍ଛେଦ କଲା ପରେ ଉଠାଦୋକାନୀମାନେ ପୁନର୍ବାର ସେହି ଜାଗା ମାଡ଼ିବସୁଛନ୍ତି। ଏ ନେଇ ବିଡିଏ ଯୋଗସୁତ୍ର ଅଧିକାରୀ ଶୁଭ୍ରାଂଶୁ ଶେଖର ମହାନ୍ତି କହିଛନ୍ତି, ଫୁଟପାଥ୍ ଯେପରି ଦଖଲ ନ ହେବ ସେଥିପାଇଁ ବିଏମ୍ସି-ବିଡିଏର ଏନଫୋର୍ସମେଣ୍ଟ ଟିମ୍ ଉଚ୍ଛେଦ କରିଥିଲା। ଏବେ ମଧ୍ୟ ଉଚ୍ଛେଦ ପ୍ରକ୍ରିୟା ଜାରି ରହିଛି। ବାରମ୍ବାର ଉଚ୍ଛେଦ କଲା ପରେ ବି ଯଦି ଲୋକେ ସଚେତନ ନ ହେବେ ତାହେଲେ ଯେତେ ଉଚ୍ଛେଦ କଲେ କିଛି ଲାଭ ନାହିଁ। ଜବରଦଖଲ ହେବା ପରେ ତା’କୁ ନଜର ରଖିବା ପାଇଁ ସ୍ପେଶାଲ ଜଏଣ୍ଟ ସ୍କାଡ୍ ଗଠନ କରାଯାଇଛି। ଯାହାକି ଶିଶୁ ଭବନରୁ ବାଣୀବିହାର ଛକ, ଏଜିଠାରୁ ରାଜମହଲ, ନନ୍ଦନକାନନଠାରୁ ଜୟଦେବ ବିହାର ପର୍ଯ୍ୟନ୍ତ ଫୁଟପାଥ୍ ଉପରେ ନଜର ରଖିବ।
