ବ୍ରହ୍ମପୁର ଅଫିସ,୨୩ା୧୨-ଉତ୍କଳ ଗ୍ରାମୀଣ ବ୍ୟାଙ୍କ କର୍ମଚାରୀ ସଂଘ ଉପଖଣ୍ଡସ୍ତରୀୟ ସମ୍ମିଳନୀ ରବିବାର ଅନୁଷ୍ଠିତ ହୋଇଯାଇଛି। ରାମଲିଙ୍ଗମ ଟେମ୍ପୁଲ ରୋଡସ୍ଥିତ ଶଙ୍କର ଭବନ ସମ୍ମିଳନୀ କକ୍ଷରେ ଆୟୋଜିତ ବୈଠକରେ ବ୍ୟାଙ୍କର ଆଞ୍ଚଳିକ ମହାପ୍ରବନ୍ଧକ ରାଜ୍ୟବର୍ଦ୍ଧନ ଧଳ ମହାପାତ୍ର ମୁଖ୍ୟଅତିଥି ଭାବେ ଯୋଗଦେଇଥିଲେ।
ଉପସଭାପତି ବେଣୁଧର ସେଠୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ସମ୍ପାଦକ ହୃଷୀକେଶ ପାତ୍ର, କର୍ମଚାରୀ ମହାସଂଘ ସାଧାରଣ ସମ୍ପାଦକ କମ୍ରେଡ ପୁଲିନ ବିହାରୀ ମିଶ୍ର, ଆଞ୍ଚଳିକ ସମ୍ପାଦକ ସୁନୀଲ ମୁଖୀ, ଫୁଲବାଣୀ କର୍ମଚାରୀ ସଂଘ ଆଞ୍ଚଳିକ ସମ୍ପାଦକ ଉମାଚରଣ ବେହେରା, ବରଗଡ ଆଞ୍ଚଳିକ ସମ୍ପାଦକ ଆଲୋକ ପ୍ରଧାନ, ସାନୁଜିତ ମିଶ୍ର ପ୍ରମୁଖ ମଞ୍ଚାସୀନ ଥିଲେ। ବ୍ୟାଙ୍କର ବର୍ତ୍ତମାନର ସ୍ଥିିତି, କର୍ତ୍ତୃପକ୍ଷଙ୍କ ଅପରିଣାମଦର୍ଶିତା ଉପରେ ମୁଖ୍ୟଅତିଥି ଗୁରୁତ୍ୱାରୋପ କରିଥିଲେ। ବର୍ତ୍ତମାନ ବ୍ୟାଙ୍କ କର୍ତ୍ତୃପକ୍ଷ ୧୭ ଜିଲାରେ କାର୍ଯ୍ୟରତ ୪୪୦ ଶାଖା ମଧ୍ୟରୁ ୬୨ ଶାଖା ବନ୍ଦ କରିବା ନିଷ୍ପତ୍ତିକୁ ସଂଘ ପକ୍ଷରୁ ତୀବ୍ର ନିନ୍ଦା କରାଯାଇଥିଲା।
ଶାଖାଗୁଡିକ ବନ୍ଦ ନିଷ୍ପତ୍ତିକୁ ବ୍ୟାଙ୍କ କର୍ତ୍ତୃପକ୍ଷ ପ୍ରତ୍ୟାହାର କରିବାକୁ ସଂଘ ଦାବି କରିଛି। ଏଥିସହ ବ୍ୟାଙ୍କ ପରିଚାଳନାଗତ ତ୍ରୁଟି ଯୋଗୁ କ୍ଷତିରେ ଚାଲିଛି। କର୍ମଚାରୀ, ଗ୍ରାହକ କ୍ଷତିଗ୍ରସ୍ତ ହେଉଥିବା ବେଳେ କର୍ତ୍ତୃପକ୍ଷ ପ୍ରାୟୋଜିତ ବ୍ୟାଙ୍କ ନିର୍ଦ୍ଦେଶରେ ନିଜ ସ୍ବାର୍ଥକୁ ବଳିଦେଇ ଏସ୍ବିଆଇ ଲାଇଭ ଭଳି ଇନ୍ସ୍ୟୁରାନ୍ସ କମ୍ପାନୀ ଏଜେଣ୍ଟ ସାଜୁଛି। ନିଜ ପାଣ୍ଠିକୁ ଠିକ୍ ଭାବେ ବିନିଯୋଗ ନ କରି କମ ସୁଧରେ ପ୍ରାୟୋଜିତ ଋଣ ଦେବା ଲାଗି ଗ୍ରାହକଙ୍କୁ ବ୍ୟାଙ୍କ ଛାଡିବାକୁ ବାଧ୍ୟ କରୁଥିବା ସଂଘ ପକ୍ଷରୁ ଅଭିଯୋଗ କରାଯାଇଛି। କର୍ତ୍ତୃପକ୍ଷଙ୍କ ଏଭଳି ନୀତିକୁ ସଂଘ ତୀବ୍ର ବିରୋଧ କରିଛି। ଏ ଦିଗରେ ବ୍ୟାଙ୍କ କର୍ତ୍ତୃପକ୍ଷ ଏହାର ଆଶୁ ସମାଧାନ ନ କଲେ ଆଗାମୀ ଦିନରେ ସଂଘ ଆନ୍ଦୋଳନକୁ ଓହ୍ଲାଇବ ବୋଲି ବୈଠକରେ ଚେତାବନୀ ଶୁଣାଯାଇଥିଲା। ଅନ୍ୟମାନଙ୍କ ମଧ୍ୟରେ ଯଯାତି କେଶରୀ ଦାଶ, କୋଷାଧ୍ୟକ୍ଷ ସମ୍ବଲପୁର ମହାସଂଘର ପ୍ରତାପ ଚନ୍ଦ୍ର ସାହୁଙ୍କ ସମେତ ସମସ୍ତ କର୍ମକର୍ତ୍ତା ସହଯୋଗ କରିଥିଲେ। ନୀହାର ରଞ୍ଜନ ମିଶ୍ର ଧନ୍ୟବାଦ ଦେଇଥିଲେ।
