ନୂଆଦିଲ୍ଲୀ,୧୪।୧୨: ନାଗରିକତା ସଂଶୋଧନ ନିୟମ(ସିଏଏ) ହେବା ପରେ ଉତ୍ତର ପୂର୍ବ ରାଜ୍ୟରେ ଦେଖାଦେଇଥିବା ହିଂସା ପରିସ୍ଥିତି ସାମାନ୍ୟ ହେବାରେ ଲାଗିଛି। ସରକାର ଗୁଆହାଟୀରେ ଲଗାଇଥିବା କର୍ଫ୍ୟୁକୁ କୋହଳ ମଧ୍ୟ କରି ଦେଇଛନ୍ତି। ଶନିବାର ସକାଳ ୯ଟାରୁ ୪ଟା ପର୍ଯ୍ୟନ୍ତ କର୍ଫ୍ୟୁରେ କୋହଳ କରାଯାଇଥିବା ଜଣାପଡିଛି। ଶୁକ୍ରବାର କିଛି ସ୍ଥାନରେ ହିଂସା ପରିସ୍ଥିତି ଦେଖାଯାଇଥିବାରୁ କର୍ଫ୍ୟୁକୁ ସମ୍ପୂର୍ଣ୍ଣ ଭାବେ ହଟାଯାଇନାହିଁ। ଭାରତର ଏଭଳି ପରିସ୍ଥିତିକୁ ଦେଖି ଆମେରିକା, ଫ୍ରାନ୍ସ ଓ ବ୍ରିଟେନ ସେମାନଙ୍କ ନାଗରିକଙ୍କ ପାଇଁ ଏକ ଆଡଭାଇଜରୀ ଜାରି କରିଛନ୍ତି। ଏହି ଆଡଭାଇଜରୀରେ କୁହାଯାଇଛି କି କିଛି ସମୟ ପାଇଁ ଆସାମ ଗସ୍ତକୁ ସ୍ଥଗିତ ରଖାଯାଉ। ଏମିତିକି ବ୍ରିଟେନ କହିଛି ନିହାତି ଜରୁରୀ ନ ଥିଲେ କେହି ଆସାମ ଗସ୍ତ କରନ୍ତୁ ନାହିଁ। ଯଦି କେହି ଯାଉଛନ୍ତି ତେବେ ସାବଧାନତାର ସହ ଗସ୍ତ କରନ୍ତୁ।
