ଅନୁଗୋଳ ଅଫିସ, ୭।୮-ଅନୁଗୋଳ ତହସିଲଦାରଙ୍କ ବିରୋଧରେ ଅଭିଯୋଗ ଆଣିଛି ଓକିଲ ସଂଘ। ମଙ୍ଗଳବାର ଅନୁଗୋଳ ଉପଜିଲାପାଳଙ୍କୁ ଭେଟି ସଂଘ କର୍ମକର୍ତ୍ତାମାନେ ଅଭିଯୋଗ ସମ୍ପର୍କରେ ଅବଗତ କରାଇଛନ୍ତି। ଏ ନେଇ ଉପଜିଲାପାଳ ବାସୁଦେବ ଶତପଥୀ କହିଛନ୍ତି, ଲିଖିତ ଅଭିଯୋଗ ହେଲେ ଜିଲାପାଳଙ୍କୁ ଅବଗତ କରାଯିବ।
ଅଭିଯୋଗରେ ଓକିଲ ସଂଘ କର୍ମକର୍ତ୍ତାମାନେ ଦର୍ଶାଇଛନ୍ତି ଯେ, ଅନୁଗୋଳ ତହସିଲଦାର ଅନେକ ସମୟରେ କାର୍ଯ୍ୟାଳୟରେ ଅନୁପସ୍ଥିତ ରହୁଛନ୍ତି। କଥା ହେବା ସମୟରେ ଦୁର୍ବ୍ୟବହାର ଦେଖାଉଛନ୍ତି। ଆର୍ଟିଆଇରେ ତଥ୍ୟ ମାଗିଲେ ଗାଳିଗୁଲଜ ଆଦି କରୁଛନ୍ତି ବୋଲି ଓକିଲ ସଂଘ ସଭାପତି ଜିତେନ୍ଦ୍ର କୁମାର ସାହୁଙ୍କ ନେତୃତ୍ୱରେ ଯାଇଥିବା ପ୍ରତିନିଧି ଦଳ ଉପଜିଲାପାଳଙ୍କୁ ଅବଗତ କରାଇଛନ୍ତି। ତେବେ ତହସିଲଦାରଙ୍କ ସହ ଯୋଗାଯୋଗ ସମ୍ଭବ ନ ହେବାରୁ ଅଭିଯୋଗ ଉପରେ ତାଙ୍କ ପ୍ରତିକ୍ରିୟା ମିଳିପାରି ନାହିଁ। ସେ ଭୁବନେଶ୍ୱରରେ ଅନୁଷ୍ଠିତ ଟ୍ରେନିଂ ପ୍ରୋଗ୍ରାମରେ ଥିବା ତାଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି। ଏହି ପ୍ରତିନିଧି ଦଳରେ ଓକିଲ ସଂଘର ପୂର୍ବତନ ସଭାପତି ଭୂପେଶ ଚନ୍ଦ୍ର ପ୍ରଧାନ, ଉପସଭାପତି ଦିଲୀପ କୁମାର ସାହୁ, କୋଷାଧ୍ୟକ୍ଷ ଗୋପାଳ ଅଗ୍ରୱାଲ, ସାଂସ୍କୃତିକ ସମ୍ପାଦକ ପ୍ରଶାନ୍ତ କୁମାର ଆଚାର୍ଯ୍ୟ, ବରିଷ୍ଠ ଆଇନଜୀବୀ ଦିବାକର ସାହୁ, ସୁରେଶ ଚନ୍ଦ୍ର ମିଶ୍ର, ଜ୍ୟୋତି ତ୍ରିପାଠୀ, ବୈକୁଣ୍ଠ ନାଥ ଦ୍ୱିବେଦୀ, ସଂଗ୍ରାମ ପ୍ରଧାନ, ନିରୋଦ କୁମାର ମିଶ୍ର, ପ୍ରତାପ ଚନ୍ଦ୍ର ନାଏକ, ରଞ୍ଜନ କୁମାର ପାତ୍ର, ରାଜୀବ ଲୋଚନ ସାହୁ, ଧ୍ରୁବଚରଣ ଦେହୁରୀ, ସୁମନ୍ତ ବିଶ୍ୱାଳ, ସରୋଜ କୁମାର ରାଉତ ପ୍ରମୁଖ ଉପସ୍ଥିତ ଥିଲେ।
