ମଣିଷର ଆଦିମ ସାଥୀ ହେଉଛି କୁକୁର। ଏହା ବିଶ୍ୱସ୍ତ ଭୃତ୍ୟ ପରି କାର୍ଯ୍ୟ କରିଥାଏ। ଅଧୁନା ମଣିଷ ବିଶ୍ୱାସଘାତକ ସାଜୁଥିବା ବେଳେ ଏହି ଇତର ପ୍ରାଣୀଟି ଯାହାର ଲୁଣ ଖାଏ ତାହାର ଗୁଣ ଗାଏ। ତାମିଲନାଡୁର ତାଞ୍ଜାଭୁରଠାରେ ଏକ ପୋଷା କୁକୁର ଗୋଟିଏ ବିଷଧର ସାପଠାରୁ ମାଲିକକୁ ବଞ୍ଚାଇବାକୁ ଯାଇ ନିଜେ ଦଂଶନର ଶିକାର ହୋଇ ମୃତ୍ୟୁବରଣ କରିଛି। ଭେଙ୍ଗରାୟାନ୍କୁଡିକାଡୁ ଗଁାର ଚାଷୀ ନଟରାଜନ୍ (୫୦) ତାଙ୍କ ପୋଷା କୁକୁରକୁ ନେଇ ଶନିବାର କୃଷିକ୍ଷେତ୍ରକୁ ଯାଉଥିବା ବେଳେ ଘରଠାରୁ ଅଳ୍ପକିଛି ଦୂରରେ ଏକ ବିଷଧର ସାପ ଫଣା ଟେକି କାମୁଡିବାକୁ ଉଦ୍ୟତ ହେଉଥିଲା। ଏହି ସମୟରେ ‘ପପି’ ନାମକ ଏହି କୁକୁରଟି ଏହାର ପ୍ରତିରୋଧ କରିଥିଲା। କୁକୁର ଓ ସାପ ମୁହାଁମୁହିଁ ହୋଇଥିବାବେଳେ ସାପକୁ ବାଡେଇବା ପାଇଁ ନଟରାଜନ୍ ଏକ ବାଡ଼ି ଆଣିବା ପାଇଁ ଘରକୁ ଦୌଡ଼ିଥିଲେ। ଘରୁ ଫେରିଆସି ଦେଖନ୍ତି ତ ପପି ସାପଟିକୁ ମାରିଦେଇଛି। ଅଥଚ ମାରିବା ପୂର୍ବରୁ ସାପଠାରୁ ଚୋଟ ଖାଇ ଲଢ଼େଇ ଜାରି ରଖିଥିଲା। ସାପ ଓ କୁକୁର ଲଢ଼େଇ ବିଷୟ ଜାଣିବା ପରେ ଆଖପାଖ ଗଁାର ଲୋକେ ଘଟଣାସ୍ଥଳରେ ଠୁଳ ହୋଇଯାଇଥିଲେ। ନଟରାଜନ୍ ପୋଷା କୁକୁରକୁ ହରାଇ ମ୍ରିୟମାଣ ହୋଇପଡ଼ିବା ସହିତ କିଛି ସମୟ ନିଜ ଛାତିରେ ତାକୁ ଚାପି ଧରିଥିଲେ। ଏହାପରେ କାନ୍ଦିକାନ୍ଦି ନିଜ ଘର ନିକଟରେ କୁକୁରକୁ ସମାଧି ଦେଇଥିଲେ। ଏହି କରୁଣ ଦୃଶ୍ୟ ସୋସିଆଲ ମିଡିଆରେ ଭାଇରାଲ ହୋଇଛି।
