ପିଲା ହଜିଗଲେ ପୋଲିସ ଯେମିତି ଖୋଜେ ଠିକ୍ ସେମିତି ଶୁଆକୁ ଖୋଜା ଚାଲିଛି ଉତ୍ତରପ୍ରଦେଶର ବାରାଣସୀରେ। ପାଞ୍ଚଦିନ ହେବ ପୋଲିସ ଖୋଜୁଛି ଶୁଆକୁ। ଜୋତପୁର ଥାନା ଅନ୍ତର୍ଗତ ଦାରାନଗରରେ ଘଟିଛି ଏମିତିକା ଘଟଣା। ଦାରାନଗରନିବାସୀ ଶିକ୍ଷକ ଅରବିନ୍ଦ କୁମାର ଏକ ଶୁଆ ପାଳିଥିଲେ । ତା’ ନାଁ ଆଲେକ୍ସ। ଶୁଆଟି କେଉଁଆଡେ ଉଡିଯିବା ପରେ ଅରବିନ୍ଦ ଥାନାରେ ଏ ସଂକ୍ରାନ୍ତରେ ରିପୋର୍ଟ କରିଛନ୍ତି। ରିପୋର୍ଟ ପାଇବା ପରେ ପୋଲିସ ପୂରା ଦମ୍ରେ ଶୁଆକୁ ଖୋଜିବାରେ ଲାଗିପଡିଛି। ଅରବିନ୍ଦଙ୍କ ପରିବାର ସ୍ଥାନୀୟ ଅଞ୍ଚଳର ସବୁ ଗଳିକନ୍ଦିରେ ପୋଷ୍ଟର ଛାଇ କରିଦେଇଛନ୍ତି। ସୋସିଆଲ ମିଡିଆରେ ବି ବିଜ୍ଞାପନ ଦିଆଯାଇଛି। କେବଳ ଏତିକି ନୁହେଁ, ଯିଏ ଶୁଆକୁ ଖୋଜିଦେବେ ତାଙ୍କୁ ୫୧୦୦ ଟଙ୍କା ପୁରସ୍କାର ଦିଆଯିବ ବୋଲି ଘୋଷଣା କରାଯାଇଛି। ଶୁଆଟି ପରିବାର ଲୋକଙ୍କ ସାଙ୍ଗରେ ଖାଏ, ଶୁଏ । ପିଲାଙ୍କ ସାଥୀରେ ଭିଡିଓ ଗେମ୍ ଖେଳେ ଓ ଟିଭି ବି ଦେଖେ । ଶୁଆଟି ପରିିବାରର ସଦସ୍ୟ ଭଳି ଥିବାରୁ ତାକୁ ଖୋଜିବା ପାଇଁ ପୋଲିସରେ ରିପୋର୍ଟ କରାଯାଇଛି ବୋଲି କୁହନ୍ତି ଅରବିନ୍ଦ।
