ଜଣେ ମହିଳା ଚାଷୀ ୧୦ ହଜାର ମହିଳାଙ୍କୁ ସଶକ୍ତ କରିବା କିଛି କମ୍ କଥା ନୁହେଁ। ଏମିତି ଜଣେ ମହିଳା ହେଉଛନ୍ତି ବିହାରର ମୁଙ୍ଗେର ଜିଲା ତିତିବମ୍ବର ବ୍ଲକ୍ ଅନ୍ତର୍ଗତ ଧାଉରି ଗାଁର ବୀଣା ଦେବୀ । ସେ ମୁଙ୍ଗେର କୃଷି ବିଜ୍ଞାନ କେନ୍ଦ୍ରରୁ ଛତୁଚାଷ ସମ୍ପର୍କରେ ପ୍ରଶିକ୍ଷଣ ଲାଭ କରି ୨୦୧୩ରେ ପ୍ରଥମେ ଏହି ଚାଷ ଆରମ୍ଭ କରିଥିଲେ। ତାଙ୍କ ପରିବାରରେ କେବଳ ପୁରୁଷମାନେ ଚାଷ କରିବାର ପରମ୍ପରା ରହିଥିବାବେଳେ ବୀଣା ତାକୁ ଭାଙ୍ଗି ଛତୁ ଚାଷ କରିଥିଲେ। ପ୍ରଥମେ ଦୈନିକ ୧ କିଲୋ ଛତୁ ଉପତ୍ାଦନ କରୁଥିଲେ। ପରେ ଏହାକୁ ବଢାଇବାରେ ସକ୍ଷମ ହୋଇଥିଲେ। କେବଳ ଚାଷକରୁ ନ ଥିଲେ ବରଂ ଛତୁ ନେଇ ହାଟକୁ ବିକ୍ରି କରିବା ପାଇଁ ଯାଉଥିଲେ। ଏଭଳି କାର୍ଯ୍ୟ ଅଞ୍ଚଳର ସମସ୍ତ ମହିଳାଙ୍କ ପକ୍ଷରେ ସମ୍ଭବ ନ ଥିଲା । କିନ୍ତୁ ତାଙ୍କ ପ୍ରେରଣାରେ ଏବେ ସବୁ ମହିଳାମାନଙ୍କ ପାଇଁ ଏହା ସମ୍ଭବ ହୋଇପାରିଛି ବୋଲି କହନ୍ତି ୪୩ ବର୍ଷୀୟା ବୀଣା। ସେ ଏବେ ୫ଟି ବ୍ଲକ୍ର ପାଖାପାଖି ୧୦୫ଟି ଗାଁରେ ୧୦,୦୦୦ ମହିଳାଙ୍କୁ ଛତୁଚାଷ ସମ୍ପର୍କରେ ପ୍ରଶିକ୍ଷଣ ଦେଇସାରିଛନ୍ତି। ତାଙ୍କୁ ବିହାରର ‘ମସ୍ରୁମ ଲେଡି’ ବୋଲି କୁହାଯାଉଛି। ତାଙ୍କଠାରୁ ପ୍ରଶିକ୍ଷଣ ପାଇ ଏବେ ୧,୫୦୦ ମହିଳା ଛତୁ ସହ ଅନ୍ୟ ଚାଷ କରୁଛନ୍ତି। ଗୋମୂତ୍ର ଓ ଗୋବରରୁ ବୀଣା ଜୈବିକ ଖତ ମଧ୍ୟ ପ୍ରସ୍ତୁତ କରୁଛନ୍ତି। ୭୦୦ ମହିଳାମାନଙ୍କୁ ମୋବାଇଲ ବ୍ୟବହାର ସମ୍ପର୍କରେ ବି ଶିକ୍ଷା ଦେଇ ଟାଟା ଟ୍ରଷ୍ଟ ପକ୍ଷରୁ ପୁରସ୍କୃତ ହୋଇଛନ୍ତି।
