ଦାମ୍ପତ୍ୟ ଜୀବନରେ ଚୁମ୍ବନର ରହିଛି ଏକ ଗୁରୁତ୍ୱପୂର୍ଣ୍ଣ ଭୂମିକା। ତେବେ ମେକ୍ସିକୋର ଏମିତି ଏକ ସ୍ଥାନ ଅଛି ଯେଉଁଠାରେ ଦମ୍ପତି ଚୁମ୍ବନ ଦେବା ଲାଗି ଘଣ୍ଟା ଘଣ୍ଟା ଧରି ଲାଇନ୍ରେ ଠିଆ ହୋଇ ଥାଆନ୍ତି। ସେଣ୍ଟ୍ରାଲ ମେକ୍ସିକୋର ଗୁଆନଜୁଆତୋ। ଏଠାରେ ଦମ୍ପତି ମାନେ ଗୋଟିଏ ଥର ଚୁମ୍ବନ ଦେଲେ ୧୫ ବର୍ଷ ପର୍ଯ୍ୟନ୍ତ ଖୁସିରେ ରହିଥାଆନ୍ତି ବୋଲି କୁହାଯାଏ। ବିଶେଷ କରି ଫେବୃୟାରୀରେ ଏଠି ଦମ୍ପତିଙ୍କର ଭିଡ ଲାଗିଥାଏ। ଏଠାରେ ଥିବା ଛୋଟିଆ ଗଳିରେ ଦମ୍ପତିମାନେ ଚୁମ୍ବନ ଦେବା ସହ ଏଠାରେ ଏକ ବାର୍ତ୍ତା ଛାଡି ଯାଇଥାଆନ୍ତି। ଏହି ଗଳି ‘କିସ୍ ଗଳି’ ବା ଚୁମ୍ବନ ଗଳି ନାମରେ ପରିଚିତ। ଏହା ପଛର ଇତିହାସ କହେ ଏଠାରେ ଜଣେ ଧନୀ ଘରର ଝିଅ ଡୋନା କାର୍ମୀନ ଜଣେ ଗରିବ ଘରର ପୁଅ ଲୁଇସଙ୍କୁ ପ୍ରେମ କରୁଥିଲେ। ହେଲେ ଏଥିରେ ଡୋନାଙ୍କ ପରିବାର ଲୋକେ ଆଦୌ ସହମତି ଦେଇ ନ ଥିଲେ। ଫଳରେ ପରସ୍ପରକୁ ଚୁମ୍ବନ ଦେବା ଲାଗି ଡୋନାଙ୍କ ପାଖଘରକୁ ଭଡା ସୂତ୍ରରେ ନେଇଥିଲେ ଲୁଇସ୍। ବିଳମ୍ବିତ ରାତିରେ ଏହି ପ୍ରେମୀ ଯୁଗଳ ବାଲକୋନିରେ ପରସ୍ପରକୁ ଚୁମ୍ବନ ଦେଉଥିଲେ। ହେଲେ ଏକଥା ଡୋନାଙ୍କ ପିତା ଜାଣିବା ପରେ ସେ ଡୋନାଙ୍କୁ ଜୀବନରୁ ମାରି ଦେଇଥିଲେ। ଆଉ ଏତିକିବେଳେ ଡୋନାଙ୍କୁ ବଞ୍ଚାଇବାକୁ ଯାଇ ଲୁଇସ୍ ବାଲକୋନିରୁ ଡେଇଁ ପଡିବା ସମୟରେ ତଳେ ପଡି ଯିବାରୁ ତାଙ୍କର ମଧ୍ୟ ମୃତ୍ୟୁ ହୋଇଥିଲା। ତା’ପରଠାରୁ ଏହି ଗଳିକୁ ପ୍ରେମୀ ଯୁଗଳଙ୍କ ଗଳି ବୋଲି କୁହାଯାଏ। ଡୋନା-ଲୁଇସଙ୍କ ସ୍ମୃତିରେ ଲୋକେ ସେବେଠାରୁ ଏହି ଗଳିରେ ଆସି ଚୁମ୍ବନ ଦେଲେ ଦାମ୍ପତ୍ୟ ଜୀବନ ସୁଖମୟ ହୁଏ ବୋଲି ବିଶ୍ୱାସ ରହିଛି।
