ନୂଆଦିଲ୍ଲୀ,୨୯।୪: କୋଭିଡ୍-୧୯ ବିରୋଧରେ ଲଢ଼େଇ ଜାରି ରଖିବା ଲାଗି ଏସିଆନ ଡେଭଲପମେଣ୍ଟ ବ୍ୟାଙ୍କ(ଏଡିବି) ଭାରତକୁ ୧.୫ ବିଲିୟନ ଡଲାର( ପ୍ରାୟ ୧୨ ହଜାର କୋଟି ଟଙ୍କା)ର ଋଣ ସହାୟତା ସମ୍ପର୍କରେ ମଙ୍ଗଳବାର ଘୋଷଣା କରିଛି। ଗରିବ, ସାମାଜିକ ଦୁର୍ବଳ ବର୍ଗ ଏବଂ ମହାମାରୀକୁ ରୋକିବା ଦିଗରେ ବିଭିନ୍ନ କାର୍ଯ୍ୟପନ୍ଥା ଗ୍ରହଣ କରିବା ଲାଗି ଏଭଳି ଋଣ ମଞ୍ଜୁର କରାଯାଇଛି ବୋଲି ବ୍ୟାଙ୍କ ପକ୍ଷରୁ କୁହାଯାଇଛି। ବର୍ତ୍ତମାନର ଚ୍ୟାଲେଞ୍ଜିଂ ସମୟରେ ଭାରତ ସରକାରଙ୍କ ସହ ରହିଛୁ ବୋଲି ଏଡିବିର ସଭାପତି ଏମ୍.ଆଶାକାଓ୍ବା ସୂଚନା ଦେଇଛନ୍ତି।
ସେ କହିଛନ୍ତି, ଭାରତୀୟ ଦୀର୍ଘମିଆଦୀ ଯୋଜନାଗୁଡ଼ିକୁ ସହାୟତା ଦିଗରେ ଏଡିବି ସର୍ବଦା ଯୋଗଦାନ ରଖୁଛି। ଭାରତର ଉନ୍ନତିରେ ଏକ ଅଂଶୀଦାର ଭାବେ ବୃହତ୍ ଯୋଜନାର ଏକ ଅଂଶଭାବରେ ତ୍ୱରିତ ଋଣ ମଞ୍ଜୁର କରାଯାଇଛି। କୋଭିଡ୍-୧୯ ପ୍ରୋଗ୍ରାମ ଦିଗରେ ଏହି ସହାୟତା ଦ୍ୱାରା ଭାରତ ଲାଭବାନ ହେବା ନେଇ ଆଶାବାଦୀ ରହିଥିବା ସେ ମତବ୍ୟକ୍ତ କରିଛନ୍ତି।
ସୂଚନାଯୋଗ୍ୟ କୋଭିଡ୍ ଯୋଗୁ ସାରା ବିଶ୍ୱ ସମ୍ପୂର୍ଣ୍ଣ ଭାବେ ପ୍ରଭାବିତ ହୋଇଛି। ଭାରତ ଏଥିଲାଗି ଲକ୍ଡାଉନ ହୋଇ ରହିଛି। ଏହି ମାରାତ୍ମକ ଭୂତାଣୁ ଦ୍ୱାରା ଭାରତରେ ଏବେ ୨୯,୪୩୫ରୁ ଊର୍ଦ୍ଧ୍ୱ ଲୋକ ସଂକ୍ରମିତ ହୋଇଛନ୍ତି। ୬୮୨୯ ଜଣ ଏବେ ଠିକ୍ ହୋଇଛନ୍ତି। ଏମାନଙ୍କୁ ହସ୍ପିଟାଲରୁ ଘରକୁ ଛଡ଼ାଯାଇଛି। ସରକାରୀ ଡାଟା ମୁତାବକ ୯୩୪ ଜଣ ଏହାଦ୍ୱାରା ମୃତ୍ୟୁମୁଖରେ ପଡ଼ିଛନ୍ତି।
