ନୂଆଦିଲ୍ଲୀ,୩୦-୫: ଏନ୍ଡିଏ ସରକାର କ୍ଷମତାକୁ ଆସିବା ପରେ ଶସ୍ତା ଦରରେ ଲୋକଙ୍କୁ ଏସି ଯୋଗାଇବେ। ସରକାର ଦେଶବାସୀଙ୍କୁ ବଜାର ମୂଲ୍ୟଠାରୁ ୧୫ରୁ ୨୦ ପ୍ରତିଶତ ଶସ୍ତାରେ ଏସି କିଣିବାର ସୁଯୋଗ ଦେବେ। ଏହାକୁ ସରକାରୀ କମ୍ପାନୀ ଇଇଏସ୍ଏଲ୍ ଲଞ୍ଚ କରିବ। ନିଜ ବଜେଟ ମଧ୍ୟକୁ ଆସୁଥିବା ଏହି ଏସିରେ କମ୍ ବିଜୁଳି ଖର୍ଚ୍ଚ ହେବ। ଏହାକୁ ଯେକେହି ଘରେ ବସି ଅନ୍ଲାଇନରେ କିଣିପାରିବେ। ନିଜର ପୁରୁଣା ଏସିକୁ ଏକ୍ସଚେଞ୍ଜ କରି ନୂଆ ଏସି ନେବାର ଅଫର୍ ଲାଭ ମଧ୍ୟ ପାଇପାରିବେ। ଏହି ଏସିର ବ୍ୟବହାର ଦ୍ୱାରା ବିଜୁଳି ବିଲ୍ ପ୍ରାୟ ୩୫ରୁ ୪୦ ପ୍ରତିଶତ କମ୍ ହେବ। ଆସନ୍ତା ୧ରୁ ଦେଢ଼ ମାସ ମଧ୍ୟରେ ଏହି ସୁବିଧା ଘୋଷଣା କରାଯିବ। ଖରାପ ହେଲେ ଏଥିପାଇଁ କମ୍ପାନୀ ନିକଟକୁ ଚକ୍କର କାଟିବାକୁ ପଡିବନି। ଅନ୍ଲାଇନ ବୁକିଂର ୨୪ ଘଣ୍ଟା ମଧ୍ୟରେ ଘରେ ଏସି ପହଞ୍ଚତ୍ୟିବ। ଏଥିଲାଗି ଇଇଏସ୍ଏଲ୍ ଜୁଲାଇରୁ ସାଧାରଣ ଗ୍ରାହକଙ୍କ ଲାଗି ମାର୍କେଟ ପ୍ଲେସ୍ ଲଞ୍ଚ କରିବ। କମ୍ପାନୀ ଆସନ୍ତା ବର୍ଷକ ମଧ୍ୟରେ ୨ ଲକ୍ଷ ଲୋକଙ୍କୁ ଶସ୍ତା ଏସି ବିକ୍ରି କରିବାର ଲକ୍ଷ୍ୟ ଧାର୍ଯ୍ୟ କରିଛି। ତେବେ ଯାହାଙ୍କ ନାଁରେ ବିଜୁଳି ବିଲ୍ ଥିବ ସେ ହିଁ ଏହି ଏସିକୁ କିଣିପାରିବେ। ସୂଚନାଯୋଗ୍ୟ ଯେ, ମୋଦି ସରକାର ତାଙ୍କର ପ୍ରଥମ କାର୍ଯ୍ୟକାଳରେ ଲୋକଙ୍କୁ ଶସ୍ତାରେ ଏଲ୍ଇଡି ବଲ୍ବ ଓ ଟ୍ୟୁବ୍ଲାଇଟ, ପଙ୍ଖା ବାଣ୍ଟି ଥିଲେ। ଇଇଏସ୍ଏଲ୍ କମ୍ପାନୀ ଦେଶରେ ଏହାକୁ ଉପଲବ୍ଧ କରାଇଥିଲା।
