ନୂଆଦିଲ୍ଲୀ,୩୧।୫: ଏବେ ଦେଶ ଅନ୍ଲକ୍ ହୋଇଛି। ଅର୍ଥବ୍ୟବସ୍ଥାରେ ସୁଧାର ପାଇଁ ଦେଶର ଏକ ବୃହତମ କ୍ଷେତ୍ରକୁ ଖୋଲି ଦିଆଯାଇଛି। ତେବେ କରୋନା ମହାମାରୀ ରହିଛି। ତେଣୁ ପ୍ରତିଟି କାର୍ଯ୍ୟରେ ତଥା କ୍ଷେତ୍ରରେ ସତର୍କତା ଜରୁରୀ। ୬୫ ତମ ମନ୍ କି ବାତ୍ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ଦେଶବାସୀଙ୍କ ଉଦ୍ଦେଶ୍ୟରେ ଏଭଳି କହିଛନ୍ତି। ପ୍ରବାସୀ ଶ୍ରମିକଙ୍କ ପାଇଁ ଦେଶରେ ଟ୍ରେନ୍ ଚଳାଚଳ କରୁଛି। ଯଦି ଗାଁ ଲୋକଙ୍କ ପାଖରେ ଆବଶ୍ୟକ କାମ ଥାଆନ୍ତା ଏବଂ ଗ୍ରାମାଞ୍ଚଳରେ ଆତ୍ମନିର୍ଭରଶୀଳତା ସୃଷ୍ଟି ହୋଇପାରିଥାନ୍ତା, ଆଜି ଗାଁ ଲୋକେ ଭିଟାମାଟି ଛାଡ଼ି ପ୍ରବାସୀ ସାଜି ନ ଥାନ୍ତେ। ସେମାନଙ୍କ ଯୋଗୁ କରୋନା ସଂକ୍ରମିତଙ୍କ ସଂଖ୍ୟାରେ ବୃଦ୍ଧି ଘଟିଛି। ତେବେ ଦେଶକୁ ଆତ୍ମ ନିର୍ଭରଶୀଳ କରାଇବା ନେଇ ସଭିଏଁ ମିଳିତ ଭାବେ କାର୍ଯ୍ୟ କରିବାର ଏବେ ଆବଶ୍ୟକତା ଥିବା ପ୍ରଧାନମନ୍ତ୍ରୀ କହିଛନ୍ତିି। ଦେଶରେ କରୋନା ଲଢ଼େଇ ଧର୍ଯ୍ୟର ସହିତ ଲଢ଼ାଯାଉଛି। ଅନ୍ୟ ଦେଶ ତୁଳନାରେ ଭାରତରେ କରୋନା ମହାମାରୀର ସଂକ୍ରମଣ ତୀବ୍ରଭାବେ ହୋଇନାହିଁ। ଏହି ଯୁଦ୍ଧରେ ମିଳିତ ଭାବେ ଲଢ଼ିବା ଜରୁରୀ ବୋଲି ପ୍ରଧାନମନ୍ତ୍ରୀ କହିଛନ୍ତି।
