ବ୍ରହ୍ମପୁର ଅଫିସ,୭ା୪- କରୋନା ମହାମାରୀର ପ୍ରକୋପ ଦିନକୁ ଦିନ ଓଡ଼ିଶାରେ ବଢିବାକୁ ଲାଗିଛି। ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା ୪୧ରେ ପହଞ୍ଚତ୍ଛି। ଦକ୍ଷିଣ ଓଡ଼ିଶାର ଏକମାତ୍ର ଭରସାଯୋଗ୍ୟ ଏମ୍କେସିଜି ମେଡିକାଲରେ ଦିନକୁ ଦିନ କରୋନା ସନ୍ଦିଗ୍ଧ ସ୍ବାବ ପରୀକ୍ଷା ପାଇଁ ଭର୍ତ୍ତି ହେଉଛନ୍ତି। ଏହି ଧାରାରେ ସୋମବାର ମହାରାଷ୍ଟ୍ର ପୁନେରୁ ଗତ ୨୦ ତାରିଖରେ ଫେରିଥିବା ଦିଗପହଣ୍ଡି ବ୍ଲକ ଡେଙ୍ଗାପଦର ଗ୍ରାମର ଜଣେ ବ୍ୟକ୍ତି ଏମ୍କେସିଜି ମେଡିକାଲରେ ଭର୍ତ୍ତି ହୋଇଥିଲେ। ସେହିପରି ଗତ ୨୯ ତାରିଖରେ ଭୁବନେଶ୍ୱରରୁ ଫେରିଥିବା ଜଣେ କରୋନା ସନ୍ଦିଗ୍ଧ ମଙ୍ଗଳବାର ସକାଳେ କଶ ଓ ଜ୍ୱରରେ ଆକ୍ରାନ୍ତ ହୋଇ ସ୍ବତନ୍ତ୍ର କରୋନା ୱାର୍ଡରେ ଭର୍ତ୍ତି ହୋଇଛନ୍ତି। ସୋମବାର ମେଡିକାଲରେ ଭର୍ତ୍ତି ହୋଇଥିବା ସନ୍ଦିଗ୍ଧଙ୍କ ସ୍ବାବ ଟେଷ୍ଟ ପାଇଁ ଭୁବନେଶ୍ୱର ସ୍ଥିତ ଆରଏମଆରସିକୁ ପଠାଯାଇଥିବା ମେଡିକାଲ ଅଧିକ୍ଷକ ପ୍ରଫେସର ଡ଼.ସନ୍ତୋଷ କୁମାର ମିଶ୍ର ସୂଚନା ଦେଇଛନ୍ତି। ସେହିପରି ମଙ୍ଗଳବାର ଭର୍ତ୍ତି ହୋଇଥିବା ସନ୍ଦିଗ୍ଧଙ୍କ ସ୍ବାବ ଟେଷ୍ଟ ପାଇଁ ରିପୋର୍ଟ ପଠାଯିବ ବୋଲି ସେ କହିଛନ୍ତି। ଆଇସିଏମ୍ଆର ଠାରୁ ଅନୁମତି ମିଳିଲେ ଏମ୍କେସିଜି ମେଡିକାଲରେ ସ୍ଥାପିତ ହୋଇଥିବା ପାଲିମେରାଇଜ ଚେନ୍ ରିଆକ୍ସନ (ପିସିଆର) ମେସିନରେ କୋଭିଡ଼-୧୯ ତଥା କରୋନା ପରୀକ୍ଷା ଖୁବଶୀଘ୍ର ଆରମ୍ଭ ହୋଇଯିବ ବୋଲି ମେଡିକାଲ ଅଧୀକ୍ଷକ ମିଶ୍ର ସୂଚନା ଦେଇଛନ୍ତି।
