ଲହୁଣୀପଡ଼ା,୪।୨(ଡି.ଏନ.ଏ.): ସୁନ୍ଦରଗଡ଼ ଏମ୍ପି ତଥା ପୂର୍ବତନ କେନ୍ଦ୍ରମନ୍ତ୍ରୀ ଜୁଏଲ ଓରାମଙ୍କ ଜ୍ୟେଷ୍ଠା କନ୍ୟା ଇନ୍ଦୁମତୀଙ୍କ ସହ ବନ୍ଧମୁଣ୍ଡା ନିବାସୀ ସନ୍ତୋଷ ବାରୁୱାଙ୍କ ସୋମବାର ପାରମ୍ପାରିକ ରୀତିନୀତିରେ ବିବାହ ସମ୍ପନ୍ନ ହୋଇଯାଇଛି। ଏନେଇ ଜୁଏଲଙ୍କ ପୈତୃକ ଗ୍ରାମ କେନ୍ଦୁଡିହି ଚଳଚଞ୍ଚଳ ହୋଇଉଠିଥିଲା। ଏହି ବିବାହ ଉତ୍ସବକୁ ବହୁ ନେତାଙ୍କ ଆଗମନ ହୋଇଥିଲା। ବିଶେଷକରି ୨ ରାଜ୍ୟପାଳଙ୍କ ଆଗମନ ନେଇ ପୋଲିସ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଥିଲା। ଏପରି କି ୪ଟି ସ୍ବତନ୍ତ୍ର ହେଲିପ୍ୟାଡ ନିର୍ମାଣ କରାଯାଇଥିଲା। ପ୍ରଶାସନ ଅଧିକାରୀଙ୍କ ସହିତ କେଉଁ ନେତା ରାଜ୍ୟପାଳଙ୍କୁ ସ୍ବାଗତ କରିବେ ସେ ନେଇ ପୂର୍ବରୁ ନିଷ୍ପତ୍ତି ହୋଇଥିଲା। ନିଷ୍ପତ୍ତି ଅନୁଯାୟୀ ଅତିଥିମାନଙ୍କୁ ସ୍ବାଗତ କରାଯାଇଥିଲା। ଓଡ଼ିଶାର ରାଜ୍ୟପାଳ ପ୍ରଫେସର ଗଣେଶୀ ଲାଲ ଏବଂ ଛତିଶଗଡ଼ ରାଜ୍ୟପାଳ ଅନସୂୟା ଉଇକେ ହେଲିକପ୍ଟର ଯୋଗେ ଆସି କେନ୍ଦୁଡିହି ଗ୍ରାମରେ ନିର୍ମାଣ ହୋଇଥିବା ଅସ୍ଥାୟୀ ହେଲିପ୍ୟାଡରେ ଓହ୍ଲାଇ ଥିଲେ। ତାଙ୍କୁ ପୁଷ୍ପଗୁଚ୍ଛ ଦେଇ ସ୍ବାଗତ ସମ୍ବର୍ଦ୍ଧନା ଜ୍ଞାପନ ସହ ଶୋଭାଯାତ୍ରାରେ ବିବାହ ସ୍ଥଳକୁ ପାଛୋଟି ନିଆଯାଇଥିଲା। ସେହିପରି ପୃଥ୍ବୀରାଜ ହରିଚନ୍ଦନ, ଭ୍ରୁଗୁବକ୍ସି ପାତ୍ର ମଧ୍ୟ ହେଲିକପ୍ଟର ଯୋଗେ କେନ୍ଦୁଡିହି ଗ୍ରାମରେ ପହଞ୍ଚତ୍ଥିଲେ । ରାଜ୍ୟ ଭାଜପା ସଭାପତି ସମୀର ମହାନ୍ତି, କେନ୍ଦ୍ରୀୟ ସଂଗଠନ ସମ୍ପାଦକ ରାମଲାଲ ଜୀ, ଏମ୍ପି ନୀତେଶ ଗଙ୍ଗଦେବ, ସୁରେଶ ପୂଜାରୀ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସ୍ତ୍ରୀ ମୃଦଳା ଠାକୁର ପ୍ରଧାନ, ଏମ୍ପି ମହେଶ ସାହୁ, କଂଗ୍ରେସ ରାଜ୍ୟ ସଭାପତି ନିରଞ୍ଜନ ପଟ୍ଟନାୟକ, ବଣେଇ ବିଧାୟକ ଲକ୍ଷ୍ମଣ ମୁଣ୍ଡା, ସୁନ୍ଦରଗଡ଼ ବିଧାୟିକା କୁସୁମ ଟେଟେ, ତଲସରା ବିଧାୟକ ଭବାନୀ ଭୋଇ, ବୀରମିତ୍ରପୁର ବିଧାୟକ ଶଙ୍କର ଓରାମ, ପୂର୍ବତନ ଏମ୍ପି ରୁଦ୍ର ପାଣି, ପୂର୍ବତନ ଜିଲାପାଳ ସୁରେନ୍ଦ୍ର କୁମାର ମିର୍ଦ୍ଧା, ପୂର୍ବତନ ମୁଖ୍ୟମନ୍ତ୍ରୀ ଗିରିଧର ଗମାଙ୍ଗ, ପୂର୍ବତନ ମନ୍ତ୍ରୀ ମଙ୍ଗଳା କିଷାନ, ସାରଦା ପ୍ରସାଦ ନାଏକ, ବିରୋଧୀ ଦଳ ନେତା ପ୍ରଦୀପ ନାୟକ ପ୍ରମୁଖ ଯୋଗଦେଇ ନବଦମ୍ପତିଙ୍କୁ ଆଶୀର୍ବାଦ ପ୍ରଦାନ କରିଥିଲେ। ସୁନ୍ଦରଗଡ଼ ଜିଲାପାଳ ନିଖିଲ ପଓ୍ବନ କଲ୍ୟାଣ, ରାଉରକେଲା ଏସ୍ପି କେ.ଶିବା ସୁବ୍ରମଣୀଙ୍କ ସହ ଅନ୍ୟ ଅଧିକାରୀମାନେ ଉପସ୍ଥିତ ରହି ସୁରକ୍ଷା ବ୍ୟବସ୍ଥାର ସ୍ଥିତି ଅନୁଧ୍ୟାନ କରିଥିଲେ। ସୁରକ୍ଷା ବ୍ୟବସ୍ଥାକୁ ଦୃଷ୍ଟିରେ ରଖି ୨ଜଣ ଆଡିସିନାଲ ଏସ୍ପି, ୨ଜଣ ଡିଏସ୍ପି, ୬ଜଣ ଇନ୍ସପେକ୍ଟର, ୧୦ଜଣ ସବ୍ଇନ୍ସପେକ୍ଟର, ରିଜର୍ଭ ପୋଲିସ ବାହିନୀର ୫ ପ୍ଲାଟୁନ ଫୋର୍ସ, ୮୦ଜଣ ଗୃହରକ୍ଷୀଙ୍କୁ ମୁତୟନ କରାଯାଇଥିଲା। ବିବାହ ଉତ୍ସବ ପୂର୍ବଦିନ ନବୀନ ଜିନ୍ଦଲ ଯୋଗ ଦେଇଥିଲେ। ପ୍ରାୟ ୨୦ ହଜାରରୁ ଊର୍ଦ୍ଧ୍ୱ ଲୋକ ବିବାହ ଉତ୍ସବରେ ଯୋଗଦେଇଥିବା ଜଣାପଡିଛି।
