ଚିତ୍ରଡା,୧୩ା୪(ଡ଼ି.ଏନ୍.ଏ.): କରୋନା ଯୋଗୁ ଲକ ଡାଉନ ଚାଲି ଥିବାରୁ ଉଭୟ କେନ୍ଦ୍ର ଓ ରାଜ୍ୟ ସରକାର ଖାଦ୍ୟ ସୁରକ୍ଷା ଯୋଜନାରେ ରାଶନକାର୍ଡଧାରୀ ପରିବାରର ସଦସ୍ୟଙ୍କ ମୁଣ୍ଡ ପିଛା ୫ କିଲୋ ଚାଉଳ ଆଗୁଆ ୩ ମାସର ଦେବାର ବ୍ୟବସ୍ଥା କରିଛନ୍ତି। ତେବେ ମୟୂରଭଞ୍ଜ ଜିଲା ମୋରଡା ବ୍ଲକ ଅଧୀନ ଭାଲିଆଡ଼ିହା ପଞ୍ଚାୟତରେ ଏହି ପିଡ଼ିଏସ ଚାଉଳ ଓଜନରେ କମ୍ ଦିଆଯାଉଥିବା ହିତାଧିକାରୀମାନେ ଅଭିଯୋଗ କରିଛନ୍ତି। ରବିବାର ପୂର୍ବାହ୍ନ ୧୦ଟା ସମୟରେ ଭାଲିିଆଡିହା ପଞ୍ଚାୟତ କାର୍ଯ୍ୟାଳୟରେ ହିତାଧିକାରୀଙ୍କୁ ଚାଉଳ ବଣ୍ଟନ ବେଳେ ଓଜନରେ କମୁ ଥିବା ଜଣା ପଡ଼ିଥିଲା। ହିତାଧିକାରୀମାନଙ୍କ ସନ୍ଦେହ ହେବାରୁ ସେମାନେ ଅନ୍ୟ ଏକ ଓଜନ ଯନ୍ତ୍ରରେ ଦ୍ୱିତୀୟ ଥର ଓଜନ କରିବାରୁ ୫୦ କିଲୋ ଚାଉଳରେ ୨ କିଲୋ କମିଥିବା ଜଣା ପଡ଼ିଥିଲା। ଏନେଇ ରାଜେନ୍ଦ୍ର ବିନ୍ଧାଣି, ରାମଚନ୍ଦ୍ର ସୋରେନ, ମାଳତୀ ସୋରେନ ପ୍ରମୁଖ ହିତାଧିକାରୀମାନେ ଫୋନ ଯୋଗେ ବ୍ଲକ ଯୋଗାଣ ଅଧିକାରୀଙ୍କୁ ଜଣାଇଥିଲେ। ଅଭିଯୋଗ ପାଇ ଯୋଗାଣ ଅଧିକାରୀ ବେଣୁଧର ମହାପାତ୍ର ଉକ୍ତ ପଞ୍ଚାୟତରେ ପହଞ୍ଚି ଘଟଣାର ତଦନ୍ତ କରିଥିଲେ। ଏନେଇ ଯୋଗାଣ ଅଧିକାରୀ ମହାପାତ୍ରଙ୍କୁ ପଚାରିବାରୁ ହିତାଧିକାରୀଙ୍କ ଅଭିଯୋଗ ମିଥ୍ୟା ବୋଲି କହିଛନ୍ତି। ସେ ନିଜେ ଦୁଇରୁ ତିନି ଜଣଙ୍କ ଘରକୁ ଯାଇ ଚାଉଳ ବୁରାକୁ ଓଜନ କରିବାରୁ ଗୋଟିଏ ବୁରାରେ ପାଞ୍ଚ ଗ୍ରାମ କମ୍ ଏବଂ ଅନ୍ୟ ଜଣଙ୍କ ବୁରାରେ ୧୫୦ ଗ୍ରାମ ଚାଉଳ ଅଧିକ ଥିଲା ବୋଲି କହିଛନ୍ତି। ତେବେ ଚାଉଳ ଓଜନ ହେଉଥିବା ଯନ୍ତ୍ରକୁ ପରୀକ୍ଷା କରିବାକୁ ସେ ନେଇଛନ୍ତି ବୋଲି ପ୍ରକାଶ କରିଛନ୍ତି।
