ଭୁବନେଶ୍ୱର, ୩୦ା୪(କ୍ରୀଡ଼ା ପ୍ରତିନିଧି)-ଯାହା ଆଶା କରାଯାଉଥିଲା ତାହା ହିଁ ହେଲା। ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍)ରେ ଗତ ସିଜନଠାରୁ ଭୁବନେଶ୍ୱର ଭିତ୍ତିକ ହୋଇଥିବା ଫ୍ରାଞ୍ଚାଇଜ୍ ଓଡ଼ିଶା ଏଫ୍ସି ପ୍ରତିଭାସମ୍ପନ୍ନ ଓଡ଼ିଆ ଫୁଟବଲ ଖେଳାଳି ଶୁଭମ୍ ଷଡ଼ଙ୍ଗୀଙ୍କ ସହ ଚୁକ୍ତିମିଆଦ ବୃଦ୍ଧି କରିଛି। ବୁଧବାର ହୋଇଥିବା ଚୁକ୍ତି ଅନୁସାରେ ୧୯ ବର୍ଷୀୟ ଶୁଭମ୍ ୨୦୨୩ ପର୍ଯ୍ୟନ୍ତ କ୍ଲବ ପକ୍ଷରୁ ଖେଳିବେ। ” ଶୁଭମ୍ ୧୭ ବର୍ଷର ହୋଇଥିବାବେଳେ କ୍ଲବ ସହିତ ଯୋଡ଼ି ହୋଇଥିଲେ। ସେ ଜଣେ ବିଚକ୍ଷଣ ପ୍ରତିଭାଧାରୀ ହୋଇଥିବାରୁ ପ୍ରଥମ ଖେଳାଳିଭାବେ ଆମେ ତାଙ୍କୁ ଆସ୍ପିରେ ଏକାଡେମୀକୁ ପଠାଇଥିଲୁ। ସମୟ ବଢ଼ିବା ସହ ସେ କ୍ରମେ ଅଭିଜ୍ଞ ହୋଇଛନ୍ତି ଏବଂ ଆଗାମୀ ଦିନରେ ଆହୁରି ଚମତ୍କାର ଖେଳବେ ବୋଲି ଆମର ଆଶା ରହିଛି। ଚଳିତ ବର୍ଷ ତାଙ୍କ ପ୍ରଦର୍ଶନ ଦର୍ଶନୀୟ ଥିଲା। ଏହା ତାଙ୍କ ପାଇଁ ଆରମ୍ଭ ମାତ୍ର। ସେ ବହୁତ ଆଗକୁ ଯାଇପାରିବେ ବୋଲି ପ୍ରମାଣିତ କରି ସାରିଛନ୍ତି। କଠିନ ପରିଶ୍ରମ ସହ ଧୈର୍ଯ୍ୟ ରଖିଲେ ଜଣେ ନିଜ ସ୍ବପ୍ନ ସାର୍ଥକ କରିପାରିବ ବୋଲି ଶୁଭମ୍ ପ୍ରମାଣିତ କରିଛନ୍ତି। ଓଡ଼ିଶା ଖେଳାଳିଙ୍କ ପାଇଁ ସେ ଆଦର୍ଶ ସାଜିଛନ୍ତି“ ବୋଲି କ୍ଲବ ସଭାପତି ରୋହନ ଶର୍ମା ପ୍ରକାଶ କରିଛନ୍ତି।
ଚୁକ୍ତି ମିଆଦ ବୃଦ୍ଧିରେ ଶୁଭମ୍ ସ୍ବାଭାବିକ ଖୁସି ଜାହିର କରିଛନ୍ତି। ”ଆଗାମୀ ୩ ବର୍ଷ ପାଇଁ ଓଡ଼ିଶା ଏଫ୍ସି ସହିତ ରହିବା ନିଶ୍ଚିତ ହୋଇଥିବାରୁ ମୁଁ ବହୁତ ଖୁସି। କଳିଙ୍ଗ ଷ୍ଟାଡିୟମରେ ଘରୋଇ ଦର୍ଶକଙ୍କ ସମ୍ମୁଖରେ ଖେଳିବାକୁ ମୁଁ ବହୁତ ଉପଭୋଗ କରିଛି। କ୍ଲବ ପାଇଁ ଆଗାମୀ ଦିନରେ ମଧ୍ୟ ଶ୍ରେଷ୍ଠ ପ୍ରଦର୍ଶନ ପାଇଁ ମୁଁ ପ୍ରତିଶ୍ରୁତିବଦ୍ଧ। ଚୁକ୍ତି ବଢ଼ାଇଥିବାରୁ ଏବଂ କ୍ରମାଗତଭାବେ ସମର୍ଥନ ଦେଇ ଆସିଥିବାରୁ କ୍ଲବ ମ୍ୟାନେଜମେଣ୍ଟ ନିକଟରେ ମୁଁ କୃତଜ୍ଞ। ଆଗାମୀ ଦିନରେ ପଡ଼ିଆରେ ଭଲ ଖେଳି କ୍ଲବ ଏବଂ ମୋ ରାଜ୍ୟକୁ ଗର୍ବିତ କରିବାକୁ ଚେଷ୍ଟା କରିବି“ ବୋଲି ଶୁଭମ୍ ନିଜ ପ୍ରତିକ୍ରିୟାରେ କହିଛନ୍ତି।
