ବଡ଼ବିଲ,୨୫।୩(ସ୍ବ.ପ୍ର.): ଦେଶବ୍ୟାପୀ ମଙ୍ଗଳବାର ମଧ୍ୟରାତ୍ରିରୁ ଲକ୍ଡାଉନ୍ ଘୋଷଣା ହୋଇଛି। ସେଥିପାଇଁ କେନ୍ଦୁଝର ଜିଲା ଝାଡ଼ଖଣ୍ଡ ରାଜ୍ୟ ସୀମାନ୍ତ ବଡ଼ବିଲରେ ପୋଲିସ ପ୍ରଶାସନ କଡ଼ା ପଦକ୍ଷେପ ନେଇଛି। ଓଡ଼ିଶା ଓ ଝାଡ଼ଖଣ୍ଡ ସୀମାକୁ ସିଲ୍ କରାଯାଇଥିଲା ବେଳେ ଅତି ଜରୁରୀ ନ ହେଲେ ଜନସାଧାରଣଙ୍କୁ ଘରୁ ନ ବାହାରିବାକୁ ପୋଲିସ ତାଗିଦ କରିଛି। ଏଥିରେ ଖିଲାପ କଲେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ଚେତାବନୀ ଦେଇଛି। ତେବେ ବିଭିନ୍ନ ସ୍ଥାନରେ ପୋଲିସ ପାଟ୍ରୋଲିଂ ଜାରି ରଖିଛି। ଓଡ଼ିଶାରେ ଲୁହାପଥର ବୋଝେଇ ଭାରୀଯାନଗୁଡ଼ିକ ଯାତାୟାତ ପାଇଁ ଅନୁମତି ରହିଥିଲାବେଳେ ଝାଡ଼ଖଣ୍ଡରେ ଚଳାଚଳ ବନ୍ଦ ରହିଥିବାରୁ ନିଜ ରାଜ୍ୟକୁ ଯାଇ ନ ପାରି ଓଡ଼ିଶା ସୀମାନ୍ତରେ ଅଟକି ରହିଛି ଶହଶହ ଭାରୀଯାନ। ଫଳରେ ଟ୍ରକ ଡ୍ରାଇଭର ଓ ହେଲପରମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଛନ୍ତି। ଦୋକାନ ବଜାର ବନ୍ଦ ରହିଥିବାରୁ ଖାଇବାକୁ ନ ପାଇ ଡହଳ ବିକଳ ହେଉଛନ୍ତି। ତେବେ ୨୧ ଦିନ ଧରି ଲକ୍ଡାଉନ୍ ପର୍ଯ୍ୟନ୍ତ ଖାଦ୍ୟ ନ ପାଇଲେ ଜୀବନ ରହିବ କି ନାହିଁ ତାହା ପ୍ରଶ୍ନବାଚୀ ସୃଷ୍ଟି ହୋଇଛି। ଏପରି ସ୍ଥିତିରେ ସରକାର ସେମାନଙ୍କ ନିମନ୍ତେ କିଛି ସୁବିଧା କଲେ ଉପକୃତ ହେବେ ବୋଲି ଛତିଶଗଡ଼ର ଚାଳକମାନେ କହିଛନ୍ତି।
