ଭୁବନେଶ୍ୱର,୭।୧୧(ବ୍ୟୁରୋ): ଦକ୍ଷିଣ-ପୂର୍ବ ବଙ୍ଗୋପସାଗରରେ ସୃଷ୍ଟ ହୋଇଥିବା ଲଘୁଚାପ ଗଭୀର ଅବପାତରେ ପରିଣତ ହୋଇଛି। ସମ୍ଭାବ୍ୟ ବାତ୍ୟା ‘ବୁଲ୍ବୁଲ’ର ପ୍ରଭାବ ଓଡ଼ିଶାରେ ପଡିବ ନାହିଁ ବୋଲି ବୁଧବାର ଏସଆରସି ପ୍ରଦୀପ ଜେନା ସୂଚନା ଦେଇଥିଲାବେଳେ ଗୁରୁବାର ସେ ଆଇଏମଡି ଆଧାରରେ ମତ ପରିବର୍ତ୍ତନ କରି ରାଜ୍ୟରେ ବାତ୍ୟାର ଆଂଶିକ ପ୍ରଭାବ ରହିବ ବୋଲି କହିଛନ୍ତି। ସେ କହିଛନ୍ତି, ଆଗ ଅପେକ୍ଷା ବାତ୍ୟାର ଗତି ବୃଦ୍ଧି ପାଇଛି। ଏବେ ଘଣ୍ଟାକୁ ୧୩ କିମି ବେଗରେ ଗତି କରୁଛି ବୁଲ୍ବୁଲ୍। ବାତ୍ୟାର ବେଗ ବଢୁଥିବାରୁ ମତ ପରିବର୍ତ୍ତନ କରାଯାଇଛିି। ୯/୧୦ ତାରିଖ ପରିବର୍ତ୍ତେ ଗୋଟିଏ ଦିନ ଆଗରୁ ରାଜ୍ୟର ବିଭିନ୍ନ ସ୍ଥାନରେ ବର୍ଷାପବନ ହେବ। ୮ ତାରିଖ ସକାଳୁ ବର୍ଷାପବନ ଆରମ୍ଭ ହୋଇଯିବ। ୧୦ ତାରିଖ ବେଳକୁ ବର୍ଷା ଛାଡିଯିବ। ଏହାଦ୍ୱାରା ମୟୁରଭଞ୍ଜ, ଯାଜପୁର, ଭଦ୍ରକ, କେନ୍ଦୁଝର, ଭଦ୍ରକ ଏବଂ ବାଲେଶ୍ୱର ଆଦି ଜିଲାଗୁଡିକ ପ୍ରଭାବିତ ହେବେ। କଟକ, ପୁରୀ ଜଗତସିଂହପୁର ଜିଲାରେ ପ୍ରବଳ ବର୍ଷା ହେବ। ସମସ୍ତ ଜିଲାରେ ଏନଡିଆରଏଫ ଏବଂ ଓଡ୍ରାଫ୍ ଟିମ୍ ସଜାଗ ରଖାଯାଇଛି। ଆବଶ୍ୟକ ପଡିଲେ ଜିଲାରେ ସ୍ଥାନାନ୍ତରଣ ପ୍ରକ୍ରିୟା ଆରମ୍ଭ ହେବ ବୋଲି ଏସଆରସି ସୂଚନା ଦେଇଛନ୍ତି।
