ଭୁବନେଶ୍ୱର,୧୧ା୧୨(ବ୍ୟୁରୋ): ପ୍ରଦେଶ କଂଗ୍ରେସ କମିଟି (ପିସିସି) ସଭାପତି ନିରଞ୍ଜନ ପଟ୍ଟନାୟକଙ୍କ ବିରୋଧରେ ଦଳର ଗୋଟିଏ ବଡ଼ ଗୋଷ୍ଠୀ ବର୍ତ୍ତମାନ ସକ୍ରିୟ ହୋଇଯାଇଥିବା ଜଣାପଡ଼ିଛି। ସୋମବାର ଗୋଟିଏ ବଡ଼ ଗୋଷ୍ଠୀ ସୋନିଆଙ୍କୁ ଭେଟି ପିସିସି ସଭାପତି ବିରୋଧୀ ମନ୍ତବ୍ୟ ରଖିଥିବା ଜଣାପଡିଛି। ନିଜ ଆସନକୁ ସୁରକ୍ଷିତ ରଖିବା ପାଇଁ ନିରଞ୍ଜନ ମଧ୍ୟ ପ୍ରସ୍ତୁତ ହେଉଥିବା କୁହାଯାଉଛି। ଏ ପରିସ୍ଥିତିରେ ଅଖିଳ ଭାରତ କଂଗ୍ରେସ କମିଟି (ଏଆଇସିସି) ପକ୍ଷରୁ ଦିଲ୍ଲୀର ରାମଲୀଳା ମଇଦାନରେ ଭାରତ ବଞ୍ଚାଓ ସମାବେଶ ଆସନ୍ତା ୧୪ ତାରିଖରେ ଆୟୋଜନ ହେବାକୁ ଯାଉଛି। ଏହି ସମାବେଶରେ ପ୍ରାୟ ୧୦୦୦ରୁ ଅଧିକ ଲୋକଙ୍କୁ ସାଙ୍ଗରେ ନେବା ପାଇଁ ନିରଞ୍ଜନ ଯୋଜନା ରଖିଛନ୍ତି। ହେଲେ ନିଜ ହାତରୁ ଯିବାଆସିବା ଭଡ଼ା ଦେଇ ଦିଲ୍ଲୀ ଯିବା ସକାଶେ ପିସିସି ସଭାପତି ଏକ ବ୍ୟବସ୍ଥା କରିଛନ୍ତି। ୧ ହଜାର ଟଙ୍କା ଲେଖାଁଏ କଂଗ୍ରେସ କାର୍ଯ୍ୟାଳୟରେ ଦାଖଲ କରିବା ଲାଗି ଦଳୀୟ ନେତା ଓ କର୍ମୀଙ୍କୁ କୁହାଯାଇଛି। ଏହି ଟଙ୍କା ଆଦାୟ ପଦ୍ଧତିକୁ କଂଗ୍ରେସ ନେତା ଓ କର୍ମୀ ନିନ୍ଦା କରୁଛନ୍ତି। ଅପରପକ୍ଷରେ ବୁଧବାର ଓଡ଼ିଶାରୁ ନେତାମାନେ ନିଜ ନିଜ କର୍ମୀଙ୍କୁ ସାଙ୍ଗରେ ଧରି ଦିଲ୍ଲୀ ଗସ୍ତ କରିବେ। ଆଗୁଆ ପିସିସି ସଭାପତି ଦିଲ୍ଲୀ ଯାଇ ନିଜ କର୍ମୀଙ୍କ ରହିବା ବ୍ୟବସ୍ଥା କରୁଥିବା ଚର୍ଚ୍ଚା ହେଉଛି। ଅପରପକ୍ଷରେ ଏହି ମଉକାରେ ନିରଞ୍ଜନ ନିଜର ଗୋଟିଏ ଗୋଷ୍ଠୀକୁ ସାଙ୍ଗରେ ଧରି ତାଙ୍କ ବିରୋଧରେ ଯାଇଥିବା ଗୋଷ୍ଠୀର କାଉଣ୍ଟର ଦେବେ ବୋଲି ଚାରିଆଡ଼େ ଚର୍ଚ୍ଚା ଆରମ୍ଭ ହୋଇଯାଇଛି।
