ମୁମ୍ବାଇ,୧୬।୩: ଦେଶର ମେଟ୍ରୋ ସହରଗୁଡିକରେ ରବିବାର ପେଟ୍ରୋଲ ଏବଂ ଡିଜେଲ ଦରରେ ହ୍ରାସ ପରିଲକ୍ଷିତ ହୋଇଛି। ପେଟ୍ରୋଲ ଦର ଲିଟର ପିଛା ୧୨ ପଇସା କମିଥିବା ବେଳେ ଡିଜେଲ ଦର ଲିଟର ପିଛା ୧୪ ପଇସା ଖସିଛି। ଅନ୍ତର୍ଜାତୀୟ ବଜାରରେ ତୈଳ ଦର ହ୍ରାସ ହୋଇଥିବା ବେଳେ ଏହି ସମୟରେ ସରକାର ଉତ୍ପାଦ ଟିକସ ମଧ୍ୟ ବଢାଇଛନ୍ତି। ଏହାର ଗୋଟିଏ ଦିନ ପରେ ଇନ୍ଧନ ଦରରେ ଏଭଳି ହ୍ରାସ ହୋଇଥିବା ନଜରକୁ ଆସିଛି। ରବିବାର ନୂଆଦିଲ୍ଲୀରେ ପେଟ୍ରୋଲ ଦର ଲିଟର ପିଛା ୬୯.୭୫ ଟଙ୍କା ଥିବା ବେଳେ ଡିଜେଲ ଦର ୬୨. ୪୪ ଟଙ୍କା ରହିଥିବା ରାଷ୍ଟ୍ରାୟତ୍ତ ତୈଳ ବିପଣନ କମ୍ପାନୀଗୁଡିକ ଦେଇଥିବା ତଥ୍ୟରୁ ସାମ୍ନାକୁ ଆସିଛି।
ଶନିବାର ଠାରୁ ଇନ୍ଧନ ଉପରେ ଉତ୍ପାଦ ଟିକସ ଭାବେ ଲିଟର ପିଛା ୩ ଟଙ୍କା ଲାଗୁ କରାଯାଇଛି। ପେଟ୍ରୋଲ,ଡିଜେଲର ରିଟେଲ ମୂଲ୍ୟ ବଢିବ ନାହିଁ ବୋଲି ଶିଳ୍ପ ପକ୍ଷରୁ ଜଣେ ଅଧିକାରୀ କହିଥିଲେ। ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ହ୍ରାସ ହୋଇଥିବାରୁ ବର୍ଦ୍ଧିତ ମୂଲ୍ୟକୁ କମ୍ପାନୀଗୁଡିକ ନିଜ ମଧ୍ୟରେ ବ୍ୟବସ୍ଥିତ କରିବା ନେଇ ଯୋଜନା ରହିଥିଲା। ରବିବାର ଇନ୍ଧନ ମୂଲ୍ୟରେ ହ୍ରାସ ଘଟିଥିବାରୁ ଏହା ଦ୍ୱାରା ଗ୍ରାହକଙ୍କୁ ସାମାନ୍ୟ ଲାଭ ମିଳିଛି। ସରକାର ଉତ୍ପାଦ ଟିକସ ବୃଦ୍ଧିରୁ ବାର୍ଷିକ ୩୯,୦୦୦ କୋଟି ଟଙ୍କାର ରାଜସ୍ବ ଲାଭ କରିବେ। ୨୦୧୪-୧୫ରେ ଅନ୍ତର୍ଜାତୀୟ ବଜାରରେ ତୈଳ ଦର ନିମ୍ନରେ ରହିଥିଲେ ମଧ୍ୟ ଏହାର ଲାଭ କମ୍ପାନୀଗୁଡିକ ଲୋକଙ୍କୁ ଏତେଟା ଦେଇ ନ ଥିଲେ। କେନ୍ଦ୍ରୀୟ ପରୋକ୍ଷ ଟିକସ ଏବଂ ସୀମା ଶୁଳ୍କ ବୋର୍ଡ ବିଜ୍ଞପ୍ତି ମୁତାବକ ପେଟ୍ରୋଲ ଉପରେ ସ୍ବତନ୍ତ୍ର ଉତ୍ପାଦ ଟିକସ ଭାବେ ୨ ଟଙ୍କା ବଢିଥିବା ବେଳେ ଡିଜେଲ ଉପରେ ୨ ଟଙ୍କା ବଢିଛି। ସେହିଭଳି ଉଭୟ ପେଟ୍ରୋଲ ଡିଜେଲ ଉପରେ ୧ ଟଙ୍କା ଲେଖାଏ ଅତିରିକ୍ତ ରୋଡ ସେସ୍ ଲାଗୁ କରାଯାଇଛି।
