ସାକ୍ଷୀଗୋପାଳ, ୧୫।୪(ଡି.ଏନ୍. ଏ.): ବିଶ୍ବ ମହାମରୀ କରୋନାର ଭୟାବହତା ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏହାର ମୁକାବିଲା ଲାଗି ରାଜ୍ୟ ସରକାର ନୂଆ ନୂଆ ପଦକ୍ଷେପ ଗ୍ରହଣ କରୁଛନ୍ତି। ଏହି ସଂକ୍ରମଣରୁ ରକ୍ଷା ପିଇବା ନିମନ୍ତେ ସାମାଜିକ ଦୂରତାକୁ ବିଶେଷଭାବେ ପ୍ରାଧାନ୍ୟ ଦିଆଯାଉଛି। ମାତ୍ର କେତେକ ଅମାନିଆ ଅଛନ୍ତି ଯେଉଁମାନେ ଏହି କଟକଣାକୁ ଆଦୌ ହେଲେ ମାନୁ ନାହାନ୍ତି। ପୁରୀ ଜିଲା ସାକ୍ଷୀଗୋପାଳରେ ଏହି କଟକଣାର ବ୍ୟତିକ୍ରମ ଦେଖିବାକୁ ମିଳୁଛି। ସାକ୍ଷୀଗୋପାଳ ମନ୍ଦିର ସିଂହଦାର ସମ୍ମୁଖରେ ମଙ୍ଗଳ ଆଳତୀ ଦର୍ଶନ ପାଇଁ ଶ୍ରଦ୍ଧାଳୁମାନେ ଭିଡ଼ ଲଗାଉଛନ୍ତି। ପ୍ରଶାସନ ମନ୍ଦିର ପ୍ରବେଶ ଉପରେ ରୋକ ଲଗାଇଥିବାରୁ ମନ୍ଦିର ସମ୍ମୁଖରେ ଭିଡ଼ ଲାଗୁଛି। ପୋଲିସ ପ୍ରଶାସନ ବାରମ୍ବାର ତାଗିଦ କରୁଥିଲେ ମଧ୍ୟ ଏହାର କୌଣସି ପ୍ରଭାବ ପଡ଼ୁନାହିଁ। ଏଥିପାଇଁ ସତ୍ୟବାଦୀ ଅଞ୍ଚଳର ସାପ୍ତାହିକ ହାଟକୁ ପ୍ରଶାସନ ବନ୍ଦ କରିଦେବାକୁ ବାଧ୍ୟ ହୋଇଛି। ପ୍ରତିଷେଧକ ପାଇଁ ସାଧାରଣ ଲୋକ ଚଳାଚଳ କରୁଥିବା ସ୍ଥାନଗୁଡିକରେ ବିଶୋଧନ କରାଯାଇଛି ବୋଲି କରୋନା ସତର୍କତା ଓ ବ୍ୟବସ୍ଥାର ପରିଚାଳନା କରୁଥିବା ସତ୍ୟବାଦୀ ତହସିଲଦାର କସ୍ତୁରୀ ପ୍ରଧାନ ଓ ବିଡିଓ ସରୋଜ କୁମାର ଦତ୍ତ କହିଛନ୍ତି।
