ଅନୁଗୋଳ ଅଫିସ୍, ୫।୩ – କରୋନା ଭାଇରସ୍କୁ ନେଇ ବିଶ୍ୱରେ ଆତଙ୍କ ସୃଷ୍ଟି ହୋଇଥିବା ବେଳେ ପରିସ୍ଥିତିକୁ ଦେଖି ଅନୁଗୋଳ ଜିଲା ପ୍ରଶାସନ ପକ୍ଷରୁ ମଧ୍ୟ ଏ ନେଇ ପ୍ରସ୍ତୁତି ଆରମ୍ଭ ହୋଇଛି। ଜିଲା ମୁଖ୍ୟ ଚିକିତ୍ସାଳୟରେ ଆଇସୋଲେସନ୍ ୱାର୍ଡ ଖୋଲାଯାଇଥିବା ଭାରପ୍ରାପ୍ତ ସିଡିଏମ୍ଓ ପ୍ରତାପ ବେହେରା ସୂଚନା ଦେଇଛନ୍ତି।
ସେ କହିଛନ୍ତି ଯେ, ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟ ପୁରୁଷ ଓ୍ବାର୍ଡ (ପୁରୁଣା)ରେ କରୋନା ପାଇଁ ସ୍ବତନ୍ତ୍ର ୱାର୍ଡ ଖୋଲାହୋଇଛି। ସେଠାରେ ଦୁଇଟି ବେଡ୍ ପଡ଼ିଥିବାବେଳେ ନମୁନା ସଂଗ୍ରହ କରିବାକୁ ଭାଇରାଲ ଟ୍ରାନ୍ସପୋର୍ଟ ମିଡିୟମ (ଭିଟିଏମ୍) କିଟ୍ ଓ ଏମ୍-୯୫(ମାକ୍ସ) ମହଜୁଦ୍ ରହିଛି। ତେବେ ଜିଲାରେ ଅଦ୍ୟାବଧି କେହି କରୋନା ସନ୍ଦିଗ୍ଧଙ୍କୁ ଠାବ କରାଯାଇ ନ ଥିଲେ ମଧ୍ୟ ପ୍ରଶାସନ ପକ୍ଷରୁ ସମସ୍ତ ପ୍ରକାର ପ୍ରସ୍ତୁତି କରାଯାଇଛି। ଏଥିସହ ଏକ ୨୪ଘଣ୍ଟିଆ କଣ୍ଟ୍ରୋଲ ରୁମ୍ ମଧ୍ୟ ଡିପିଏଚ୍ ପକ୍ଷରୁ ଖୋଲାଯାଇଛି। ବିଦେଶରୁ ଆସୁଥିବା ଲୋକଙ୍କ ଉପରେ ତୀକ୍ଷ୍ନ ନଜର ରଖାଯାଇଛି। ଯଦି ବିଦେଶରୁ ଆସିଥିବା ଲୋକଙ୍କଠାରେ ଏ ନେଇ ଲକ୍ଷଣ ଦେଖାଦିଏ, ତୁରନ୍ତ ତାଙ୍କୁ ଆଇସୋଲେଟେଡ୍ ୱାର୍ଡରେ ଭର୍ତ୍ତି କରାଯାଇ ରକ୍ତ ନମୁନା ଭୁବନେଶ୍ୱର ପଠାଯିବ। ତେବେ ଏଭଳି ଭାଇରସ୍କୁ ଲୋକମାନେ ନ ଡରି ସତର୍କ ରହିବା ଆବଶ୍ୟକ। ତେବେ ଏହି ରୋଗ ଓଡ଼ିଶାରେ ବ୍ୟାପିବା କଷ୍ଟକର। ତେଣୁ ଲୋକମାନେ ସଚେତନ ହେଲେ ଏହାକୁ ମୁକାବିଲା କରାଯାଇ ପାରିବ ବୋଲି ଡାକ୍ତର ବେହେରା ପ୍ରକାଶ କରିଛନ୍ତି।
