ବାରିପଦା ଅଫିସ, ୧୭ା୫-ଯାଜପୁର ଜିଲାର ଏକ ଇଟାଭାଟିରେ କାମ କରୁଥିଲେ ଶ୍ରମିକ ରୂପାଇ ଟୁଡ଼ୁ । ଘର ତାଙ୍କର ମୟୂରଭଞ୍ଜ ଜିଲା ମୋରଡ଼ା ବ୍ଲକ ବଳଦିଆ ଗ୍ରାମରେ। ଲକ୍ଡାଉନ୍ ଯୋଗୁ ଭଟାଭାଟି ବନ୍ଦ ହୋଇଯିବାରୁ ସପରିବାର ବହୁ କଷ୍ଟେମଷ୍ଟେ ଚଳିବାକୁ ଚେଷ୍ଟା କଲେ। ହେଲେ ପରିସ୍ଥିତି ଅସମ୍ଭାଳ ହୋଇପଡିଲା। ପରିବାରରେ ନିଜକୁ ମିଶାଇ ୫ ପ୍ରାଣୀ ପେଟପୂରା ଦି ଓଳି ଖାଇବା କଷ୍ଟକର ହେବାରୁ ଶେଷରେ ନିଜ ଭିଟାମାଟିକୁ ଫେରିବାକୁ ମନସ୍ଥ କଲେ। ଛୋଟ ଛୋଟ ପିଲାଙ୍କୁ କିପରି ଆଣିବେ ସେ ବିଷୟରେ ଚିନ୍ତା କରି ଏକ ଭାର ତିଆରି କଲେ। ଗୋଟିଏ ପଟେ ଭାରରେ ୪ ବର୍ଷର ଝିଅ ସୀତା ଓ ଅଢ଼େଇ ବର୍ଷର ପୁଅ ମେଘରାୟଙ୍କୁ ରଖିଲେ ଓ ଅନ୍ୟପଟେ ଜିନିଷ ଲଦି ବୋହି ଘର ଅଭିମୁଖେ ଚାଲିଲେ। ସାଥୀରେ ଥିଲେ ସ୍ତ୍ରୀ ମେଟ୍ରିକ୍ ଓ ୬ ବର୍ଷର ଝିଅ ପୁଷ୍ପାଞ୍ଜଳି। ସମସ୍ତେ ୧୫୦ କି.ମି. ଚାଲି ଚାଲି ଆସିବା ପରେ ଶୁକ୍ରବାର ଅପରାହ୍ନରେ ନିଜ ଗ୍ରାମରେ ପହଞ୍ଚିଛନ୍ତି।
୭ଦିନ ଧରି ଚାଲି ଚାଲି ଆସିବା ପରେ ସମସ୍ତଙ୍କୁ ବିଦ୍ୟାଳୟ କ୍ୱାରାଣ୍ଟାଇନ କେନ୍ଦ୍ରରେ ରଖାଯାଇଛି। ଏହି ଖବର ପ୍ରଚାରିତ ହେବା ପରେ ରାଜ୍ୟ କୃଷି ଶିଳ୍ପ ନିଗମ ଅଧ୍ୟକ୍ଷ ଦେବାଶିଷ ମହାନ୍ତି ଉକ୍ତ ପରିବାରକୁ ଭେଟି ସହାୟତାର ହାତ ବଢ଼ାଇଛନ୍ତି। ରୂପାଇ କୁହନ୍ତି, ବାଟରେ ଆସିବା ବେଳେ ବିଭିନ୍ନ ସ୍ଥାନରେ ରହିବା ସହ ସାଙ୍ଗରେ ଆଣିଥିବା ଶୁଖିଲା ଖାଦ୍ୟ ଖାଇଥିଲେ। ଜୀବନ ଥିବା ଯାଏ ଏହି କଷ୍ଟକୁ ସେ ଭୁଲିପାରିବେ ନାହିଁ।
