ଆଶଗାବାଟ,୨।୪: କରୋନା ସଂକ୍ରମଣ ଯୋଗୁ ସାରା ପୃଥିବୀରେ ଆତଙ୍କ ସୃଷ୍ଟି ହୋଇଛି। ତେବେ କରୋନା ନା ନେଲେ ଜେଲଦଣ୍ଡ ଘୋଷଣା କରାଯିବା କଥା ଶୁଣିଲେ ଯେ କେହି ଆଶ୍ଚର୍ଯ୍ୟ ହେବେ। କିନ୍ତୁ ଏହା ସତ। କେନ୍ଦ୍ରୀୟ ଏସିଆରେ କାସ୍ପିଆନ୍ ସାଗରକୂଳରେ ଥିବା ତୁର୍କିମେନିସ୍ତାନରେ ସରକାରଙ୍କ ପକ୍ଷରୁ ଏଭଳି ଆଇନ ଜାରି କରାଯାଇଛି। ଇରାନର ସୀମାକୁ ଲାଗିଥିବା ଏହି ଦେଶରେ ବର୍ତ୍ତମାନ ସୁଦ୍ଧା କୌଣସି କରୋନା ସଂକ୍ରମଣ ଘଟଣା ଘଟି ନାହିଁ। ସରକାର କରୋନା ଶବ୍ଦ ଲେଖିବା ଅବା କହିବା ଉପରେ ପ୍ରତିବନ୍ଧ ଲଗାଇଛନ୍ତି। ଏହାର ଉଲ୍ଲଂଘନ କରୁଥିବା ବ୍ୟକ୍ତିଙ୍କୁ ଗିରଫ କରି ଜେଲଦଣ୍ଡ ଦେବାକୁ ସରକାର ପୋଲିସ ବିଭାଗକୁ ନିର୍ଦ୍ଦେଶ ଦେଇଛନ୍ତି। ଏଠାରେ ମାସ୍କ ପିନ୍ଧି ସର୍ବସାଧାରଣ ସ୍ଥାନରେ ବୁଲିଲେ ସମ୍ପୃକ୍ତ ବ୍ୟକ୍ତି ବିଶେଷଙ୍କୁ ଗିରଫ କରାଯିବା ଲାଗି ମଧ୍ୟ ସରକାରୀ ନିର୍ଦ୍ଦେଶ ଜାରି ହୋଇଛି। ଲୋକଙ୍କ ମଧ୍ୟରେ ସଚେତନତା ସୃଷ୍ଟି ଲାଗି ଲଗାଯାଉଥିବା ପୋଷ୍ଟରରେ କରୋନା ଶବ୍ଦ ବଦଳରେ ଶ୍ୱାସ ସମସ୍ୟା ଏବଂ ଭୂତାଣୁ ସ୍ଥାନରେ ରୋଗ ଲେଖା ଯାଉଛି। ସରକାର ଦେଶରେ କରୋନା ଶବ୍ଦ ବିରୋଧରେ କଡ଼ା କଟକଣା ଜାରି କରିଛନ୍ତି।
