ବିଜେପୁର, ୨୮।୩(ଡି.ଏନ୍.ଏ.): କରୋନା ସଂକ୍ରମଣ ପ୍ରତିହତ କରିବାକୁ ସାମାଜିକ ଦୂରତା ନିହାତି ଆବଶ୍ୟକ। ଏହାକୁ ଗୁରୁତ୍ୱ ଦେଇ କେନ୍ଦ୍ର ସରକାର ସମଗ୍ର ଦେଶରେ ୨୧ଦିନିଆ ଲକ୍ଡାଉନ ଘୋଷଣା କରିଛନ୍ତି। ଫଳରେ ଗାଁଠୁ ସହର ସବୁଠି ଖାଁ ଖାଁ। ଜରୁରୀ କାମ ନ ଥିଲେ କେହି ବାହାରକୁ ଗୋଡ଼ କାଢୁ ନାହାଁନ୍ତି। ହେଲେ କେତେକ ସ୍ଥାନରେ ଜନସଚେତନତା ଅଭାବରୁ କିଛିଟା ବ୍ୟତିକ୍ରମ ପରିଲକ୍ଷିତ ହେଉଛି। ଗାଁ ସୁଧୁରିଲେ ଦେଶ ସୁଧୁରିବ ନ୍ୟାୟରେ ବରଗଡ଼ ଜିଲା ବିଜେପୁର ବ୍ଲକ ଅନ୍ତର୍ଗତ ଟି. ଗଣ୍ଡପାଲି ଗ୍ରାମର ଯୁବଗୋଷ୍ଠୀ ଶନିବାର ଭିନ୍ନ ପଦକ୍ଷେପ ନେଇଛନ୍ତି। ଉକ୍ତ ଗ୍ରାମକୁ ସଂଯୋଗ କରୁଥିବା ସମସ୍ତ ରାସ୍ତାକୁ ଯୁବକଗୋଷ୍ଠୀଙ୍କ ଦ୍ୱାରା ବନ୍ଦ କରାଯାଇଛି। ଜରୁରୀକାଳୀନ ସେବା ବ୍ୟତୀତ ଅନ୍ୟ କାମରେ ଗ୍ରାମ ବାହାରକୁ ନ ଯିବାକୁ ଗ୍ରାମବାସୀଙ୍କୁ ବାରଣ କରାଯାଇଛି। ଏଥିସହ ଗ୍ରାମକୁ ପ୍ରବେଶ କରୁଥିବା ବ୍ୟକ୍ତିଙ୍କୁ ହ୍ୟାଣ୍ଡ ଓ୍ବାସରେ ହାତକୁ ଭଲ ଭାବେ ଧୋଇବାକୁ ସେମାନେ ପରାମର୍ଶ ଦେଉଛନ୍ତି। ଉଭୟ ରାସ୍ତାରେ ଯୁବକମାନେ ପାଳିକରି ଜଗି ରହୁଛନ୍ତି। ଏହି ଗ୍ରାମକୁ ମୁମ୍ବାଇରେ ରହୁଥିବା ଜଣେ ଯୁବତୀ ଫେରିଛନ୍ତି। ତେଣୁ ବାହାରେ ବୁଲାବୁଲି ନ କରି ହୋମ କ୍ବାରାଣ୍ଟାଇନରେ ତାଙ୍କୁ ରହିହାକୁ ଯୁବଗୋଷ୍ଠୀ ଅନୁରୋଧ କରିଥିବା ଜଣାପଡିଛି।
