ନୂଆଦିଲ୍ଲୀ,୨୭।୩: ଦେଶରେ କରୋନା ଭାଇରସ୍ର ପ୍ରକୋପ ଜାରି ରହିଛି। ଦିନକୁ ଦିନ କରୋନାରେ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ଭାରତରେ କରୋନା ଭାଇରସ୍ରେ ଏପର୍ଯ୍ୟନ୍ତ ସଂକ୍ରମିତଙ୍କ ସଂଖ୍ୟା ୭୦୦ରୁ ଊର୍ଦ୍ଧ୍ୱ ହୋଇଥିବା ବେଳେ ଏଥିରେ ୧୬ଜଣଙ୍କ ମୃତ୍ୟୁ ହୋଇସାରିଛି। କରୋନାକୁ ନେଇ ଏବେ ସାରା ଦେଶ ଚିନ୍ତିତ ହୋଇପଡ଼ିଛି। ଏହାକୁ ଦୃଷ୍ଟିରେ ରଖି ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ(ଆର୍ବିଆଇ) ଶୁକ୍ରବାର ଏକ ବଡ଼ ନିଷ୍ପତ୍ତି ନେଇଛି। ସତର୍କତା ଦୃଷ୍ଟିରୁ ନିଜର ୫୦ଜଣ କର୍ମଚାରୀଙ୍କୁ ଆର୍ବିଆଇ କ୍ୱାରାଣ୍ଟାଇନ୍ରେ ରଖିବ। ଏନେଇ ଆର୍ବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ ଶୁକ୍ରବାର ଏକ ଖବରଦାତା ସମ୍ମିଳନୀରେ ଘୋଷଣା କରିଛନ୍ତି। ସେକହିଛନ୍ତି, କରୋନାକୁ ନେଇ ଆମେ ଗମ୍ଭୀର ଅଛୁ ଯେପରି କୌଣସି ପ୍ରକାରର ବିପଦ ନ ଘଟେ ସେଥିପ୍ରତି ଆମେ ସଜାଗ ରହିଛୁ। ତେଣୁ ସତର୍କତା ଅବଲମ୍ବନ କରି ୫୦ଜଣ କର୍ମଚାରୀଙ୍କୁ ଅଫିସ୍ରେ କ୍ୱାରାଣ୍ଟାଇନ୍ରେ ରଖାଯିବ। ଏହି ସମୟରେ ସେମାନେ ନିଜ ପରିବାର କିମ୍ବା କୌଣସି ବାହାର ବ୍ୟକ୍ତିଙ୍କୁ ଭେଟିପାରିବେ ନାହିଁ। କାରଣ ଆର୍ବିଆଇର ଯଦି ଜଣେ ବ୍ୟକ୍ତି ସଂକ୍ରମିତ ହୁଅନ୍ତି ତେବେ ସମସ୍ତ କର୍ମଚାରୀଙ୍କୁ ଯାଞ୍ଚ କରାଯାଇ ଆଇସୋଲେଶନ୍ରେ ରଖାଯିବ। ଏହାପରେ ଦେଶରେ ସମସ୍ତ ବ୍ୟାଙ୍କ ସମ୍ବନ୍ଧୀୟ କାର୍ଯ୍ୟରେ ବାଧାସୃଷ୍ଟି ହେବ। ତେବେ ବ୍ୟାଙ୍କ କାର୍ଯ୍ୟ ପ୍ରଭାବିତ ନ ହେବା ପାଇଁ ଏଭଳି ନିଷ୍ପତ୍ତି ନିଆଯାଇଛି ବୋଲି ଶକ୍ତିକାନ୍ତ କହିଛନ୍ତି।
