କଟକ ଅଫିସ,୧୮ା୩: ଏସ୍ସିବି ମେଡିକାଲରେ କରୋନା ମୁକାବିଲା ପାଇଁ ଭିତ୍ତିଭୂମି ଉପରେ ଗୁରୁତ୍ୱ ଦିଆଯାଇଛି। ସନ୍ଦିଗ୍ଧ କିମ୍ବା ଆକ୍ରାନ୍ତ ରୋଗୀ ଆସିଲେ ସେମାନଙ୍କୁ କିଭଳି ସେବା ଯୋଗାଇ ଦିଆଯିବ ସେ ନେଇ ଚିନ୍ତା ବଢିଛି। କରୋନା ନିମନ୍ତେ ସ୍ବତନ୍ତ୍ର ଭାବେ ୧୦୦୦ ଶଯ୍ୟାବିଶିଷ୍ଟ ଆଇସୋଲେଶନ ୱାର୍ଡ ଖୋଲିବା ପାଇଁ ରାଜ୍ୟ ସ୍ବାସ୍ଥ୍ୟ ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଛି। ଏସ୍ସିବି ମେଡିକାଲ ଯକ୍ଷ୍ମା ଓ ଛାତି ରୋଗ ବିଭାଗର ନୂତନ ବିଲ୍ଡିଂରେ ଏହି ୱାର୍ଡ ଖୋଲିବା ଲାଗି ନିଷ୍ପତ୍ତି ନିଆଯାଇଛି। ଏହାକୁ ତ୍ୱରାନ୍ବିତ କରିବା ପାଇଁ ପୂର୍ତ୍ତ ବିଭାଗକୁ ନିର୍ଦ୍ଦେଶ ଦିଆଯାଇଛି। ତେବେ ପ୍ରଥମ ପର୍ଯ୍ୟାୟରେ ୧୦୦ ଶଯ୍ୟା ଖୋଲିବା ଲାଗି ଚାଲିଛି ଜୋରଦାର ପ୍ରୟାସ। ଏସ୍ସିବି ମେଡିକାଲରେ କରୋନା ମୁକାବିଲା ଲାଗି ଏକ ସ୍ବତନ୍ତ୍ର ଡାକ୍ତରୀ ଟିମ୍ ଗଠନ କରାଯାଇଛି। ଏସ୍ସିବି ମେଡିକାଲର ଅତିରିକ୍ତ ଅଧୀକ୍ଷକ ଡା. ଶ୍ରୀକାନ୍ତ ପଣ୍ଡାଙ୍କ ନେତୃତ୍ୱରେ ଗଠିତ ଟିମ୍ରେ ନୋଡାଲ ଅଫିସର ଭାବେ ଛାତି ଓ କ୍ଷକ୍ଷ୍ମା ରୋଗ ବିଭାଗୀର ମୁଖ୍ୟ ପ୍ରଫେସର ମନୋରଞ୍ଜନ ପଟ୍ଟନାୟକ, ସଦସ୍ୟ ଭାବେ ଭେଷଜ, ନିଶ୍ଚେତକ, କମ୍ୟୁନିଟି ଭେଷଜ, ଇଏନ୍ଟି ବିଭାଗର ମୁଖ୍ୟଙ୍କ ସହିତ ଜରୁରିକାଳୀନ ଅଧିକାରୀ ଏବଂ ଷ୍ଟୋର ଅଫିସର ରହିଛନ୍ତି।
