ଗଞ୍ଜାମ, ୩।୪(ଡି.ଏନ୍.ଏ.): କରୋନା (କୋଭିଡ-୧୯) ସଂକ୍ରମଣକୁ ନେଇ ସାରା ବିଶ୍ୱ ଆତଙ୍କିତ ଅବସ୍ଥାରେ l ଏଥିପାଇଁ ସମସ୍ତ ଦୋକାନ ବଜାର, ହୋଟେଲ ଆଦି ବନ୍ଦ ରହିଛି। ଏହି ସମୟରେ ବିଶେଷ ଭାବେ ପନିପରିବା ଚାଷୀ ପ୍ରଭାବିତ ହେଉଛନ୍ତି। ଚଳିତ ବର୍ଷ ସବୁ ରକମର ପନିପରିବା ଭେଣ୍ଡି, ବାଇଗଣ, ଟମାଟୋ ଆଦି ବହୁ ପରିମାଣରେ ଉତ୍ପାଦନ ହୋଇଛି l କିନ୍ତୁ ବାହାରକୁ ପରିବା ଯାଇପାରୁ ନାହିଁ। ଯାହା ଫଳରେ ପରିବା ଦର ହ୍ରାସ ପାଇଛି l ବିଶେଷକରି ଟମାଟୋ ଓ ବାଇଗଣ ଅଭାବୀ ବିକ୍ରି ଚାଷୀଙ୍କ ଚିନ୍ତାକୁ ଦ୍ୱିଗୁଣିତ କରିଛି। ତେଣୁ ଚାଷୀ କ୍ଷତି ସହିବା ଏକ ପ୍ରକାର ନିଶ୍ଚିତ ହୋଇଛି l ବର୍ତ୍ତମାନ ବାଇଗଣ କିଲୋ ପିଛା ୭ରୁ ୮ ଟଙ୍କା ଓ ଟମାଟ କିଲୋ ୫ ଟଙ୍କାରେ ଚାଷୀ ବିକ୍ରି କରିବାକୁ ବାଧ୍ୟ ହେଉଛନ୍ତି। ଅନ୍ୟପଟେ ଗଞ୍ଜାମ ବ୍ଲକରେ ଶୀତଳ ଭଣ୍ଡାର ନାହିଁ, ଗ୍ରୀଷ୍ମ ପ୍ରଭାହ ବଢୁଛି l ତେଣୁ ଚାଷୀ ଅନ୍ୟ ଉପାୟ ନ ପାଇ ଶାଗମାଛ ଦରରେ ପରିବା ବିକ୍ରି କରୁଛନ୍ତି l ଚଳିତ ବର୍ଷ ସାନ ରାମଚନ୍ଦ୍ରପୁର ପଞ୍ଚାୟତର ବିଭିନ୍ନ ଗ୍ରାମ ତଥା ବୁରୁଡ଼ି, ଶିପକୁଦା ଆଦି ଗ୍ରାମର ଚାଷୀ ଋଣ ଆଣି ଏହି ଚାଷ କରିଥାନ୍ତି l ଏଥିପାଇଁ ଋଣ ଛାଡ଼ କରିବାକୁ ସ୍ଥାନୀୟ ଅଞ୍ଚଳର ଚାଷୀ ସରକାର ଓ ପ୍ରଶାସନ ନିକଟରେ ଦାବି କରିଛନ୍ତି l
