ନିମାପଡ଼ା,୧୧ା୫(ଡି.ଏନ.ଏ): ବିଶ୍ୱରେ ଏବେ ମହାମାରୀ କରୋନା ସଂକ୍ରମଣର ଘୋର ବିଭୀଷିକା ଦେଖାଦେଇଛି। କରୋନା ଯୁଦ୍ଧର ମୁକାବିଲା ପାଇଁ ପୋଲିସ, ସ୍ବାସ୍ଥ୍ୟକର୍ମୀ, ଡାକ୍ତର, ନର୍ସ, ଅଙ୍ଗନଓ୍ବାଡି କର୍ମୀ, ଆଶାକର୍ମୀ, ସରକାରୀ ଅଫିସରମାନେ ନିଜ ଜୀବନକୁ ବାଜି ଲଗାଇ ଜନସାଧାରଣଙ୍କ ସେବା କରୁଛନ୍ତି। ଏଭଳି ବିପତ୍ତି ସମୟରେ ଏହି କରୋନା ଯୋଦ୍ଧାମାନେ ନିଜ ବ୍ୟକ୍ତିଗତ କାର୍ଯ୍ୟକୁ ମଧ୍ୟ ପଛରେ ପକାଇ ଦେଇ କର୍ତ୍ତବ୍ୟକୁ ଆଗେ ଦେଖୁଛନ୍ତି। ଏହି କ୍ଷେତ୍ରରେ ନିମାପଡ଼ାର ବ୍ଳକର ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ (ପିଇଓ) ସରୋଜ କୁମାର ଦାସ ନିଜ ବିବାହ କାର୍ଯ୍ୟକୁ ରୋକି ରାଜ୍ୟ ବାହାର ଫେରନ୍ତା ପ୍ରବାସୀଙ୍କ ସେବାରେ ନିଜକୁ ନିୟୋଜିତ ରଖିଛନ୍ତି। ପିଇଓ ଦାସଙ୍କ ଚଳିତ ମାସ ୨୦ତାରିଖରେ ଜଣେ ଶିକ୍ଷୟିତ୍ରୀଙ୍କ ସହ ବିବାହ ପାଇଁ ଦିନଧାର୍ଯ୍ୟ ହୋଇଥିଲା। ତେବେ ରାଜ୍ୟରେ କରୋନା ଆକ୍ରାନ୍ତ ସଂଖ୍ୟା ବଢ଼ୁଥିବା ସ୍ଥିତିକୁ ଦେଖି କର୍ତ୍ତବ୍ୟ, ଲୋକଙ୍କ ସେବା ମୋ ପାଇଁ ବଡ ବୋଲି କହି ପିଇଓ ବିବାହକୁ ରୋକି ଦେଇଛନ୍ତି। ସେ ଏବେ ନିମାପଡ଼ା ବ୍ଳକ ବାମନାଳ ପଞ୍ଚାୟତର କ୍ୱାରାଣ୍ଟାଇନ ସେଣ୍ଟରରେ ପିଇଓ ଭାବେ କାର୍ଯ୍ୟରତ ଅଛନ୍ତି। ଏପରିକି ତାଙ୍କ ଭାବିପତ୍ନୀ ମଧ୍ୟ ଏବେ କରୋନା କାର୍ଯ୍ୟରେ ନିୟୋଜିତ ଥିବାରୁ ପିଇଓଙ୍କ କଥାରେ ସହମତ ଅଛନ୍ତି।
