ଭୁବନେଶ୍ୱର,୯।୫(ବ୍ୟୁରୋ): କଟକସ୍ଥିତ ଆଚାର୍ଯ୍ୟ ହରିହର ଆଞ୍ଚଳିକ କର୍କଟ କେନ୍ଦ୍ରରେ ଗୁରୁତ୍ୱପୂର୍ଣ୍ଣ ରୋଗୀଙ୍କ କରୋନା ପରୀକ୍ଷା ହୋଇ ନ ଥିବାରୁ ଅପରେଶନ କରାଯାଉନାହିଁ। ଫଳରେ ସେମାନଙ୍କ ସ୍ବାସ୍ଥ୍ୟାବସ୍ଥା ଜଟିଳ ହେଉଛି। ଏନେଇ ଓଡ଼ିଶା ମାନବ ଅଧିକାର କମିଶନ (ଓଏଚ୍ଆର୍ସି)ଙ୍କ ନିକଟରେ ଅଭିଯୋଗ ହେବା ପରେ ଏହାକୁ କମିଶନ ଗୁରୁତର ସହ ନେଇଛନ୍ତି। କମିଶନ ଶୁକ୍ରବାର ଆଇନଜୀବୀ ପ୍ରଦୀପ କୁମାର ପଟ୍ଟନାୟକଙ୍କୁ ତଦନ୍ତ ଦାଇତ୍ୱ ଦେଇଛନ୍ତି। ଏହି ତଦନ୍ତରେ ସହଯୋଗ କରିବାକୁ ଆଚାର୍ଯ୍ୟ ହରିହର ନିର୍ଦ୍ଦେଶକଙ୍କୁ ମଧ୍ୟ କମିଶନ ନିର୍ଦ୍ଦେଶ ଦେଇଛନ୍ତି। ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ, ଡିଏମ୍ଇଟି,ଏସ୍ସିବିର ସୁପରିଣ୍ଟେଣ୍ଡେଣ୍ଟକୁ ୩ ଦିନ ମଧ୍ୟରେ ତଦନ୍ତ ରିପୋର୍ଟ ଦେବାକୁ କୁହାଯାଇଛି। ସୂଚନାଥାଉ କି, ଏହି କର୍କଟ କେନ୍ଦ୍ରରେ ଗୁରୁତ୍ୱପୂର୍ଣ୍ଣ ରୋଗୀଙ୍କ କରୋନା ପରୀକ୍ଷା ହୋଇ ନ ଥିବା କହି କର୍ତ୍ତୃପକ୍ଷ ଅପରେଶନ କରୁନାହାନ୍ତି। ଏ ନେଇ ଯାଜପୁରର ଜଣେ ବ୍ୟକ୍ତି ଓଡ଼ିଶା ମାନବ ଅଧିକାର କମିଶନ ସଦସ୍ୟ ଜଷ୍ଟିସ ବିମଳ ପ୍ରସାଦ ଦାଶଙ୍କୁ ଫୋନ୍ କରି ଜଣାଇଥିଲେ। ଏହି ମାମଲାକୁ କମିଶନ ଗୁରୁତର ସହ ନେଇ ତଦନ୍ତ ନିର୍ଦ୍ଦେଶ ଦେଇଛନ୍ତି।
