ବେଙ୍ଗାଲୁରୁ,୨୫।୭: କର୍ନାଟକର ମେଣ୍ଟ ସରକାର ଭାଙ୍ଗି ଯିବା ପରେ ଏବେ ଭାଜପା ସେଠାରେ ସରକାର ଗଢିବାକୁ ଚାହିଁ ବସିଛି। ହେଲେ ଯେପର୍ଯ୍ୟନ୍ତ ବାଚସ୍ପତି ୧୬ ବିଦ୍ରୋହୀ ବିଧାୟକଙ୍କୁ ନେଇ କୌଣସି ମନ୍ତବ୍ୟ ଦେଇ ନାହାଁନ୍ତି ସେ ପର୍ଯ୍ୟନ୍ତ ଭାଜପା ସରକାର ଗଠନ ପାଇଁ ଦାବି କରିପାରିବ ନାହିଁ ବୋଲି କହିଛନ୍ତି ଦଳର ପ୍ରବକ୍ତା ଜି ମଧୁସୂଦନ। ଏପରି ସ୍ଥଳେ ରାଜ୍ୟରେ ରାଷ୍ଟ୍ରପତି ଶାାସନ ଜାରି କରାଯାଇଥାଏ ବୋଲି ସେ କହିଛନ୍ତି। ଯଦି ବିଦ୍ରୋହୀ ବିଧାୟକଙ୍କ ଇସ୍ତଫା ପତ୍ର ଗ୍ରହଣ କରିବାକୁ ବାଚସ୍ପତି ଅଧିକ ସମୟ ଲଗାନ୍ତି ତେବେ ରାଜ୍ୟପାଳ ଭାଜୁଭାଇ ଭାଲା ରାଷ୍ଟ୍ରପତି ଶାସନ ପାଇଁ ଅନୁମୋଦନ କରିପାରନ୍ତି ବୋଲି ସେ କହିଛନ୍ତି। ସୂଚନାଯୋଗ୍ୟ, ପୂର୍ବରୁ କଂଗ୍ରେସର ୧୩ ଓ ଜେଡି(ଏସ୍)ର ୩ ବିଦ୍ରୋହୀ ବିଧାୟକ ଚଳିତ ମାସ ପ୍ରଥମରୁ ଇସ୍ତଫା ଦେଇଥିଲେ ମଧ୍ୟ ବାଚସ୍ପତି ଏହା ଉପରେ କୌଣସି ନିଷ୍ପତ୍ତି ନେଇ ନାହାଁନ୍ତି।
