ବ୍ରହ୍ମପୁର ଅଫିସ,୫ା୩ – ଉଚ୍ଚ ମାଧ୍ୟମିକ ଶିକ୍ଷା ପରିଷଦ ଦ୍ୱାରା ପରିଚାଳିତ ଯୁକ୍ତ ୨ ପରୀକ୍ଷାର ଦ୍ୱିତୀୟ ଦିନ ବୁଧବାର କଳା ଓ ବାଣିଜ୍ୟ ବିଭାଗର ମାତୃଭାଷା ଓଡିଆ ଏବଂ କଳା, ବିଜ୍ଞାନ, ବାଣିଜ୍ୟ ବିଭାଗର ଆଧୁନିକ ଭାରତୀୟ ଭାଷା (ବିକଳ୍ପ ଇଂଲିଶ) ପରୀକ୍ଷା ହୋଇଥିଲା। ଏଥିରେ ଦକ୍ଷିଣାଞ୍ଚଳର ୫ ପରୀକ୍ଷା କେନ୍ଦ୍ରରେ କପି କରି ୭ ପରୀକ୍ଷାର୍ଥୀ ଧରାପଡିଛନ୍ତି। ସେଥିମଧ୍ୟରେ ଗଞ୍ଜାମ ଜିଲାର ୪ ପରୀକ୍ଷା କେନ୍ଦ୍ରରେ ଜୋନାଲ ସ୍କ୍ବାଡ ହାତରେ ୬ ଜଣ ଧରାପଡିଥିବା ବେଳେ ରାୟଗଡ଼ା ଜିଲାର ରାୟଗଡ଼ା ଉଚ୍ଚ ମାଧ୍ୟମିକ ବିଦ୍ୟାଳୟ ପରୀକ୍ଷା କେନ୍ଦ୍ରରେ ବାଣିଜ୍ୟ ବିଭାଗର ଜଣେ ପରୀକ୍ଷାର୍ଥୀ ଆଭ୍ୟନ୍ତରୀଣ ସ୍କ୍ବାର୍ଡ ହାତରେ ଧରାପଡିଛନ୍ତି। ଉଚ୍ଚ ମାଧ୍ୟମିକ ଶିକ୍ଷା ପରିଷଦର ଦକ୍ଷିଣାଞ୍ଚଳ ଉପସଚିବ ଡ. କୁଳମଣି ଓଝା ଏହି ସୂଚନା ଦେଇଛନ୍ତି।
ଗଞ୍ଜାମ ଜିଲା ଅନ୍ତର୍ଗତ ଗଣ୍ଡଳାସ୍ଥିତ ବେଲେଶ୍ୱର ଉଚ୍ଚ ମାଧ୍ୟମିକ ବିଦ୍ୟାଳୟର ୨ ଜଣ ପରୀକ୍ଷାର୍ଥୀ ପ୍ରଶ୍ନପତ୍ରରେ ବିଭିନ୍ନ ଚିହ୍ନ ଦେବା ସହ ଠିକ ଚିହ୍ନ ମାରି ଜୋନାଲ ସ୍କାର୍ଡ ହାତରେ ଧରାପଡିଥିଲେ। ସେହିପରି ବମକୋଇସ୍ଥିତ ଚିଦାନନ୍ଦ ସରସ୍ବତୀ ଉଚ୍ଚ ମାଧ୍ୟମିକ ବିଦ୍ୟାଳୟର ଜଣେ ପରୀକ୍ଷାର୍ଥୀ, ପୋଡାମାରିସ୍ଥିତ ବିଜ୍ଞାନ ଉଚ୍ଚ ମାଧ୍ୟମିକ ବିଦ୍ୟାଳୟ କେନ୍ଦ୍ରରେ ୨ ପରୀକ୍ଷାର୍ଥୀ ହାତରେ ଉତ୍ତର ଲେଖି ଧରାପଡ଼ିଥିବା ବେଳେ ଆଠଗଡ଼ପାଟଣାସ୍ଥିତ ନାରାୟଣୀ ଉଚ୍ଚ ମାଧ୍ୟମିକ ବିଦ୍ୟାଳୟର ଜଣେ ପରୀକ୍ଷାର୍ଥୀ କପି କରୁଥିବା ସମୟରେ ଜୋନାଲ ଼ସଦସ୍ୟଙ୍କ ଦ୍ୱାରା ଧରାପଡ଼ଥିବା ଉପସଚିବ ଓଝା ସୂଚନା ଦେଇଛନ୍ତି।
