ଭବାନୀପାଟଣା,୮।୯(ଡି.ଏନ୍.ଏ.): କଳାହାଣ୍ଡି ଜିଲା ଉପରମୁଣ୍ଡରେ ଲଗାଣ ବର୍ଷା ଯୋଗୁ ମଙ୍ଗଳପୁରସ୍ଥିତ ହାତୀ ବ୍ୟାରେଜର ୪ଟି ରେଡିଏଲ୍ ଗେଟ ଖୋଲାଯାଇଛି। ୩୨୦ କ୍ୟୁସେକ୍ ବନ୍ୟା ଜଳ ହାତୀକୁ ଛଡାଯାଇଛି । ଏଥିରେ କଲମପୁର ବ୍ଲକର ବନ୍ୟା ପ୍ରଭାବିତ ଗାଁ ଗୁଡିକର ଲୋକେ ଭୟଭୀତ ହୋଇଛନ୍ତି । ବିିରିପୁର, ମାଟିଖାଲ ଗାଁ ରାସ୍ତାରେ ୨ ଫୁଟ ଉଚ୍ଚର ପାଣି ଚାଲିଛି । ଅନେକଙ୍କ ଘରେ ବନ୍ୟା ଜଳ ପ୍ରବେଶ କରିଥିବା ଜଣାପଡ଼ିଛି। ସେହିଭଳି ନଈକୂଳିଆ ବାଲିଛଡା, ଦେପୁର, କଳାପଦର, ଟେମରା, ପୁରୁଆଗୁଡା ଆଦି ଗାଁର ଲୋକେ ଭୟଭୀତ ହୋଇପଡିଛନ୍ତି। ଖବର ପାଇ ବିଡିଓ ହେମସାଗର ଭୋଇ, ବ୍ଲକ ପ୍ରଶାସନ କର୍ମଚାରୀ ଏବଂ ଅଗ୍ନିଶମ ବିଭାଗ ପହଞ୍ଚି ବିରିପୁର ଏବଂ ମାଟିଖାଲରେ ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ଏହି ନ୍୨ ଗାଁର ଲୋକମାନଙ୍କୁ ଯୁଦ୍ଧକାଳୀନ ଭିତ୍ତିରେ ଉଦ୍ଧାର କରି କଲମପୁର କେନ୍ଦ୍ର ପ୍ରାଥମିକ ବିଦ୍ୟାଳୟକୁ ସ୍ଥାନାନ୍ତର କରାଯାଇଛି । ସେଠାରେ ସେମାନଙ୍କ ପାଇଁ ରନ୍ଧାଖାଦ୍ୟ ବ୍ୟବସ୍ଥା କରାଯାଇଛି । ସେହିପରି କଲମପୁର-ମଣ୍ଡଳ ରାସ୍ତାରେ ଭୋଳାଗାଁ ନିକଟରେ ୩ ଫୁଟ ପାଣି ପ୍ରବାହିତ ହେଉଛି । ଏ ନେଇ ଉକ୍ତ ରାସ୍ତାରେ ମଧ୍ୟ ଯାତାୟତ ବାଧାପ୍ରାପ୍ତ ହୋଇଛି ।
