ଭଞ୍ଜନଗର,୨ା୫(ଡି.ଏନ୍.ଏ.)- ପ୍ରବାସୀ ଓଡ଼ିଆଙ୍କୁ ସୁରଟରୁ ନେଇ ଫେରୁଥିବା ଏକ ବସ ଶନିବାର ରାତିରେ ଗଞ୍ଜାମ-କନ୍ଧମାଳ ସୀମାନ୍ତ କଳିଙ୍ଗା ଘାଟିରେ ଦୁର୍ଘଟଣାଗ୍ରସ୍ତ ହୋଇଛି। ଏଥିରେ ୨ଜଣଙ୍କ ମୃତ୍ୟୁ ଘଟିଛି। ସେମାନେ ହେଲେ ବୁଗୁଡ଼ା ଅଞ୍ଚଳର ଚିତ୍ତରଞ୍ଜନ ସେଠୀ ଓ ସନ୍ତୋଷ ସେଠୀ। ଦୁର୍ଘଟଣାରୁ ଅଳ୍ପକେ ବର୍ତ୍ତିଯାଇଥିବା ଅନ୍ୟ ୭୦ଜଣଙ୍କୁ ଅନ୍ୟ ଏକ ବସ୍ରେ ଆଣି କ୍ୱାରାଣ୍ଟାଇନ୍ ସେଣ୍ଟରକୁ ପଠାଯାଇଛି। ଗଞ୍ଜାମ ଓ କନ୍ଧମାଳ ପୋଲିସ ପ୍ରଶାସନ ଘଟଣାସ୍ଥଳରେ ପହଞ୍ଚତ୍ ତଦନ୍ତ ଚଳାଇଛନ୍ତି।
ଲକ୍ଡାଉନ ଯୋଗୁ ସୁରଟରେ ଫସିରହିଥିବା ଲୋକେ ଗତ ୬ ଦିନ ହେଲା ବସ୍ ଯୋଗେ ଭିଟାମାଟିକୁ ଫେରିବାରେ ଲାଗିଛନ୍ତି। ଏଭଳି ସ୍ଥିତିରେ ପ୍ରବାସୀ ଓଡିଆଙ୍କୁ ନେଇ ଆସୁଥିବା ‘ଶ୍ରୀ ପଟେଲ’ ନାମକ ବସ୍ (ନଂ.ଜିଜେ୧୮ଏକ୍ସ-୨୬୯୩)ର ଚାଳକ କଳିଙ୍ଗା ଘାଟି ଅନ୍ଧାରିକୋଟ ମନ୍ଦିର ନିକଟ ବୁଲାଣିରେ ହଠାତ୍ ବ୍ରେକ୍ ଦେଇଥିଲେ। ଫଳରେ ଚାଳକ କ୍ୟାବିନ୍ରେ ବସିଥିବା ଚିତ୍ତରଞ୍ଜନ ଓ ସନ୍ତୋଷ ଆଗ କାଚରେ ପିଟି ହୋଇଯାଇଥିଲେ। କାଚ ଭାଙ୍ଗି ଯିବାରୁ ଉଭୟେ ଚକା ତଳେ ପଡ଼ିଯାଇଥିଲେ। ଘଟଣାସ୍ଥଳରେ ଚିତ୍ତରଞ୍ଜନଙ୍କ ମୃତ୍ୟୁ ଘଟିଥିବାବେଳେ ସନ୍ତୋଷ ଗୁରୁତର ହୋଇଥିଲେ। ତାଙ୍କୁ ଆମ୍ବୁଲାନରେ ଭଞ୍ଜନଗର ମେଡ଼ିକାଲକୁ ଅଣାଯାଇଥିଲା। ସେଠାରେ ସନ୍ତୋଷଙ୍କୁ ଡାକ୍ତର ମୃତ ଘୋଷଣା କରିଥିଲେ। ଭଞ୍ଜନଗର ବିଡ଼ିଓ ଅନିଲ କୁମାର ସେଠୀ ପୋଲିସ ଫୋର୍ସ ସହ ଘଟଣାସ୍ଥଳରେ ଅଛନ୍ତି।
