କାମାକ୍ଷାନଗର, ୧୪।୬(ଡି.ଏନ୍.ଏ.)-କାର୍ରେ ମଦ ଚାଲାଣ କରୁଥିବାବେଳେ କାମାକ୍ଷାନଗର ପୋଲିସ ହାତରେ ଧରାପଡ଼ିଛନ୍ତି ୨ ଅଭିଯୁକ୍ତ। ସେମାନେ ହେଲେ ମାର୍ଥାପୁର ଗ୍ରାମର ଅନିଲ ମିଶ୍ର ଏବଂ ଡ୍ରାଇଭର ବିରଜା ପ୍ରସାଦ ନନ୍ଦ। ଗାଡ଼ିରୁ ୨୨୮ ବୋତଲ ବିଅର, ୪୮ ବୋତଲ ଦାମୀ ବ୍ରାଣ୍ଡର ବିଦେଶୀ ମଦ ଜବତ କରାଯାଇଛି। ଏ ନେଇ ନଂ. ୧୧୩/୧୯ରେ ମାମଲା ରୁଜୁ କରାଯାଇଛି।
ଜିରାଳ-ଦିଘୀ ରାସ୍ତାରେ ଏକ କାର୍ (ଓଡି ୦୨ ଜି ୮୩୩୭)ରେ ମଦ ଚାଲାଣ ହେଉଥିବା ପୋଲିସକୁ ବିଶ୍ୱସ୍ତ ସୂତ୍ରରୁ ସୂଚନା ମିଳିଥିଲା। ଥାନାଧିକାରୀ ନିରଞ୍ଜନ ସେଠୀଙ୍କ ନିର୍ଦ୍ଦେଶରେ ଏଏସଆଇ ରାଧାନାଥ ଦାସ, ରବିନାରାୟଣ ବେହେରା ସଦଳବଳ ଚଢ଼ାଉ କରି ଜିରାଳ ନିକଟରୁ କାର୍କୁ ଧରିଥିଲେ। ଏହି ମଦ ଚାଲାଣର ଚେର ଜିଲା ବାହାରକୁ ବ୍ୟାପିଥିବା ଅନୁମାନ କରାଯାଉଛି। ବିଭିନ୍ନ ତଥ୍ୟ ଆଧାରରେ ପୋଲିସ ଖୋଳତାଡ଼ ଆରମ୍ଭ କରିଛି।
