ମନମୁଣ୍ଡା,୯।୫ (ଡି.ଏନ.ଏ.)-ନିକଟରେ ହୋଇଥିବା କାଳବୈଶାଖୀରେ ବୌଦ୍ଧ ଜିଲାର ବିଭିନ୍ନ ଅଞ୍ଚଳରେ ୭୪୪ ଜଣଙ୍କ ଘର ଭାଙ୍ଗି ଯାଇଥିବା ପ୍ରାଥମିକ ତଦନ୍ତରୁ ଜଣା ପଡ଼ିଛି। ବିପନ୍ନ ଲୋକେ ଖୋଲା ଆକାଶ ତଳେ ପଡି ରହି ଅତି ଦୟନୀୟ ଭାବେ ଦିନ କାଟୁଛନ୍ତି। କଣ୍ଟାମାଳ ତହସିଲ ତଥା ବ୍ଲକର ଅନେକ ବ୍ୟକ୍ତିଙ୍କ ଘର ଛପର ଉଡିଯାଇଛି। ମନମୁଣ୍ଡା ଡାକ୍ତରଖାନାରେ ଗଛ ଓ ବିଦ୍ୟୁତ ଖୁଣ୍ଟ ପଡିଛି। ସ୍ଥାନୀୟ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ମଧ୍ୟ ଗଛ ପଡି କ୍ଷୟକ୍ଷତି ଘଟିଛି । କାଳବୈଶାଖୀ ପ୍ରଭାବରେ ଏହି ଅଞ୍ଚଳରେ ଶତାଧିକ ଗଛ ଉପୁଡି ପଡିଛି। ମନମୁଣ୍ଡା, ମହୁଲବାହାଲି, ଗୁଡଭେଲିପଦର, ଶୁଣ୍ଢିପଦର, ଘିକୁଣ୍ଡି, ଖଟଖଟିଆ ଅଞ୍ଚଳରେ ମଧ୍ୟ ବହୁ ଲୋକଙ୍କ ଘର ଛପର ଉଡି ଯାଇଛି। କ୍ଷତିଗ୍ରସ୍ତ ପରିବାର ସଦସ୍ୟ କିଏ ଅନ୍ୟ ବାରଣ୍ଡାରେ ତ ଆଉ କିଏ ଖୋଲା ଆକାଶ ତଳେ ପଡି ରହିଛନ୍ତି। ଅଦ୍ୟାବଧି ପ୍ରଶାସନ ତରଫରୁ ସେମାନଙ୍କୁ ପାଲ ଖଣ୍ଡିଏ ମଧ୍ୟ ଦିଆଯାଇ ନାହିଁ । ବୌଦ୍ଧ ତହସିଲଦାରଙ୍କ ସୂତ୍ରରୁ ୭୪୪ ଜଣଙ୍କ ଘର ଭାଙ୍ଗିଥିବା ଜାଣିବାକୁ ମିଳିଛି। ପ୍ରଶାସନ ଏହି କ୍ଷତିଗ୍ରସ୍ତ ପରିବାରକୁ ତୁରନ୍ତ ସାହାଯ୍ୟ ଯୋଗାଇ ଦେବାକୁ ଭାଜପା ରାଜ୍ୟ ଯୁବ ସମ୍ପାଦକ ଓମ୍ପ୍ରକାଶ ମିଶ୍ର ଏବଂ ମନମୁଣ୍ଡା ମଣ୍ଡଳ ସଭାପତି ନିରଞ୍ଜନ କର୍ଣ୍ଣ ଦାବି କରିଛନ୍ତି।
