ନୂଆଦିଲ୍ଲୀ,୯।୬: ଦେଶର ପ୍ରଥମ ମହିଳା ଆଇପିଏସ୍ ଅଫିସର କିରଣ ବେଦି ମଙ୍ଗଳବାର ୭୧ ବର୍ଷରେ ପାଦ ଦେଇଛନ୍ତି। ସେ ୧୯୪୯ ଜୁନ୍ ୯ରେ ପଞ୍ଜାବର ଅମୃତସରଠାରେ ଜନ୍ମଗ୍ରହଣ କରିଥିଲେ। ୧୯୭୫ରେ ଦେଶର ପ୍ରଥମ ମହିଳା ଆଇପିଏସ୍ ଅଫସର ଭାବେ ସେ କାର୍ଯ୍ୟ ଆରମ୍ଭ କରିଥିଲେ। ୧୯୭୨ରେ ସେ ଆଇପିଏସ୍ ଅଫିସର ଭାବେ ଟ୍ରେନିଂ ନେଇଥିଲେ। ଟ୍ରେନିଂ ସମୟରେ ବୃଜ୍ ବେଦିଙ୍କ ସହିତ ତାଙ୍କର ସାକ୍ଷାତ୍ ହୋଇଥିଲା। ସାକ୍ଷାତ୍ ଧୀରେ ଧୀରେ ବଢ଼ିଥିଲା। ପରେ ଦୁହେଁ ବିବାହ ପାଇଁ ମନସ୍ଥ କରିଥିଲେ। ବିବାହ ଲାଗି ଶୁଭ ମୁହୂର୍ତ୍ତ ରାତି ୨ଟାରେ ଥିଲା। ବୃଜ୍ କିରଣଙ୍କ ଘରେ ଗେଟ୍ ଡେଇଁ ପହଞ୍ଚିଥିଲେ। ଦୁହେଁ ଚାଲି ଚାଲି ମନ୍ଦିରରେ ପହଞ୍ଚିଥିଲେ। ପୂଜାରିଙ୍କୁ ଉଠାଇଥିଲେ। ତେବେ ପୂଜାରି କହିଥିଲେ ଏବେ ଠାକୁର ଶୋଇଛନ୍ତି। ପରେ ଦୁହେଁ ମାଳା ଅଦଳବଦଳ କରି ବିବାହ କରିଥିଲେ। ତାପର ଦିନ ସକାଳେ ଦୁହେଁ ନିଜ ନିଜ କାମରେ ଅଫିସ ଯାଇଥିଲେ। ଇତିମଧ୍ୟରେ ବୃଜ୍ଙ୍କ ପରଲୋକ ହୋଇସାରିଛି। ୨୦୧୬ ଜାନୁୟାରୀ ୩୧ରେ ତାଙ୍କର ଦେହାନ୍ତ ହୋଇଥିଲା। ଏବେ କିରଣ ପୁଡୁଚେରୀର ଲ୍ୟୁଟନାଟ୍ ଗଭର୍ନର ଭାବେ ଅବସ୍ଥାପିତ ଅଛନ୍ତି। ସରକାରୀ ଚାକିରୀରେ ଉଲ୍ଲେଖନୀୟ କାର୍ଯ୍ୟ ଯୋଗୁ ତାଙ୍କୁ ୧୯୯୪ରେ ରେମନ ମାଗାସେସ ପୁରସ୍କାର ପ୍ରଦାନ କରାଯାଇଥିଲା। ଟିଭି ଶୋ ଆପ୍ କି କଚେରୀରେ ସେ କାଷ୍ଟ କଳାକାର ଭାବେ ଅଭିନୟ କରିଥିଲେ। ୨୦୦୮ ଡିସେମ୍ବର ୧ରେ ଏହାର ପ୍ରଥମ ଏପିସୋଡ଼ ପ୍ରସାରିତ ହୋଇଥିଲା।
