ବଇଣ୍ଡା,୬ା୫(ଡି.ଏନ୍.ଏ)-ଅନୁଗୋଳ ଜିଲା କିଶୋରନଗର ବ୍ଲକର ବିଭିନ୍ନ ଗ୍ରାମରେ ମଙ୍ଗଳବାର ବିଳମ୍ବିତ ରାତିରେ ଝଡ଼ତୋଫାନ ସହ ବର୍ଷା ହୋଇଛି। ପ୍ରବଳ ବର୍ଷା ସହ ପବନ ହୋଇଥିବା ଯୋଗୁ ଡାଳପକା ଗ୍ରାମର ରଘୁନାଥ ବେହେରାଙ୍କ ୩ ବଖରା ଆଜବେଷ୍ଟସ ଉଡି ଯାଇଛି। ରଘୁନାଥଙ୍କ ସପରିବାର ଘରେ ଶୋଇଥିବାବେଳେ ଅଳ୍ପକେ ବର୍ତ୍ତି ଯାଇଛନ୍ତି। ସେହିପରି ଅଁଳାବେରେଣୀ ଗ୍ରାମର କୁମର ସାହୁଙ୍କ ୨ ବଖରା, ଅନାମ ସାହୁଙ୍କ ୨ ବଖରା, ଟକବା ଗ୍ରାମର କୁଞ୍ଜ ବେହେରାଙ୍କ ୨ ବଖରା ଚାଳ ଛପର ଉଡ଼ି ଯାଇଛି। ଏଥିସହିତ ବହୁ ଗଛ ଗୁଡ଼ିକ ଭାଙ୍ଗିଯାଇ ରାସ୍ତାରେ ପଡ଼ିବାସହ ବିଦ୍ୟୁତ ଯୋଗାଣରେ ବ୍ୟାଘାତ ଦେଖାଦେଇଛି। ତୁରନ୍ତ କ୍ଷତିଗ୍ରସ୍ତଙ୍କୁ ଚିହ୍ନଟ କରାଯାଇ କ୍ଷତିପୂରଣ ଯୋଗାଇ ଦେବା ପାଇଁ ସାଧାରଣରେ ଦାବି ହୋଇଛି।
