ଜଗତ୍ସିଂହପୁର ଅଫିସ,୨୧।୯: ଜଗତ୍ସିଂହପୁର ଜିଲା ବାଲିକୁଦା ଥାନା ଅନ୍ତର୍ଗତ ପ୍ରସନ୍ନପୁରର କୁନି ପ୍ରଧାନ(୮୩)ଙ୍କୁ ୨୦୧୪ ମସିହାରେ ତାଙ୍କ ନାତି ବଳରାମ ସ୍ବାଇଁ ହତ୍ୟା କରିଥିବା ଅଭିଯୋଗ ହୋଇଥିଲା। ଏହି ମାମଲାର ରାୟ ଶୁକ୍ରବାର ପ୍ରକାଶ ପାଇଛି। ମାମଲାର ବିଚାର କରି ଜଗତ୍ସିଂହପୁର ଜିଲା ଓ ଦୌରାଜଜ୍ ଆନନ୍ଦ ଚନ୍ଦ୍ର ବେହେରା ଅଭିଯୁକ୍ତ ବଳରାମଙ୍କୁ ଆଜୀବନ ଜେଲ୍ ଦଣ୍ଡରେ ଦଣ୍ଡିତ କରିଛନ୍ତି। ଏଥିସହ ୫ ହଜାର ଟଙ୍କା ଜରିମାନା ଧାର୍ଯ୍ୟ କରିଛନ୍ତି। ଏହି ଅର୍ଥ ଅନାଦେୟ ହେଲେ ଅଧିକ ୬ମାସ ଜେଲ୍ ଭୋଗିବାକୁ ପଡ଼ିବ। ଏଥିସହ ମୃତ କୁନିଙ୍କ ପରିବାରକୁ ଜିଲା ଆଇନ ସେବା ପ୍ରାଧିକରଣ ତରଫରୁ କ୍ଷତିପୂରଣ ଦେବାକୁ ନିର୍ଦ୍ଦେଶ ହୋଇଛି ବୋଲି ପବ୍ଲିକ ପ୍ରସିକ୍ୟୁଟର ନଳିନୀକାନ୍ତ ମହାରଣା ସୂଚନା ଦେଇଛନ୍ତି। ସେ କହିଛନ୍ତି ଯେ, ୨୦୧୪ ଏପ୍ରିଲ ୨୬ ତାରଖ ଅପରାହ୍ନ ୪.୩୦ରେ ଘରେ କେହି ନ ଥିବାବେଳେ କୁନି ପିନ୍ଧିଥିବା ସୁନା କାନଫୁଲ ଉପରେ ବଳରାମଙ୍କ ନଜର ପଡ଼ିଥିଲା। ସେତେବେଳେ କୁନି ରୋଷେଇ ଘରେ ଥିଲେ। ବଳରାମ କାନଫୁଲ ଛଡ଼ାଇବାକୁ ଚେଷ୍ଟା କରିବାରୁ କୁନି ଚିତ୍କାର କରିଥିଲେ। ତେଣୁ ବଳରାମ ଏକ ଠେଙ୍ଗାରେ ତାଙ୍କୁ ପିଟିଦେବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ପରେ ବଳରାମ ଘରୁ ଦୌଡ଼ି ପଳାଉଥିବାବେଳେ ତାଙ୍କ ଖୁଡ଼ି ଦେଖିଥିଲେ। ସଙ୍ଗେ ସଙ୍ଗେ କୁନିଙ୍କୁ ବାଲିକୁଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥିବା ବେଳେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏନେଇ ଡାକ୍ତର ରବୀନ୍ଦ୍ରନାଥ ପାଲଙ୍କ ଅଭିଯୋଗ କ୍ରମେ ବାଲିକୁଦା ଥାନାରେ ମାମଲା ନଂ.୭୪/୧୪ ରୁଜୁ ହୋଇଥିଲା। ଦୋଷୀ ବଳରାମଙ୍କ ପିତା ଗୋକୁଳ ପ୍ରଧାନଙ୍କ ସମେତ ୧୦ଜଣଙ୍କ ବୟାନକୁ ଭିତ୍ତି କରି ବିଚାରପତି ଉପରୋକ୍ତ ରାୟ ଶୁଣାଇଛନ୍ତି।
