ସଜନାଗଡ଼, ୨୯।୬(ଡି.ଏନ.ଏ.)-ବାଲେଶ୍ୱର ଜିଲା ନୀଳଗିରି ବ୍ଲକରେ ଥିବା କୁଲଡିହା ଅଭୟାରଣ୍ୟରେ ବନ୍ୟପ୍ରାଣୀ ଏବେ ଅସୁରକ୍ଷିତ ହୋଇପଡିଛନ୍ତି। ଶୁକ୍ରବାର କୁଲଡିହା ଅଭୟାରଣ୍ୟ ଅଧୀନ ତଥା ହାତୀଖୁଲିଆ-କୁନ୍ଦୁଡ଼ି ରାସ୍ତାରେ ୩ଟି ବୁଲା କୁକୁର ହରିଣକୁ ଆକ୍ରମଣ କରିଥିଲେ। ହରିଣ ପ୍ରାଣ ବିକଳରେ ଦୌଡୁଥିବା ବେଳେ ପାର୍ଶ୍ୱରେ ଥିବା ନାଳରେ ପଡ଼ିଯାଇଥିଲା। ସେଠାରେ ତାର ମୃତ୍ୟୁ ହୋଇଯାଇଥିବା ବନ ବିଭାଗ ସୂତ୍ରରୁ ଜଣାପଡିଛି।
ଏକଦା ଘଞ୍ଚ ଜଙ୍ଗଲରେ ପରିପୂର୍ଣ୍ଣ ସ୍ବର୍ଣ୍ଣଚୂଡ଼ ପାହାଡ଼ ଓ ଦେବଗିରି, ତେଣ୍ଡା, କୁଲଡିହା ସଂରକ୍ଷିତ ଜଙ୍ଗଲ ବିଭିନ୍ନ ବନ୍ୟଜନ୍ତୁଙ୍କ ବାସସ୍ଥଳୀ ଥିଲା। ଏମାନଙ୍କ ସୁରକ୍ଷା ପାଇଁ ୧୯୮୪ ମସିହାରେ ରାଜ୍ୟ ସରକାରଙ୍କ ସୁପାରିଶକ୍ରମେ କେନ୍ଦ୍ର ସରକାର ଦେବଗିରି, ତେଣ୍ଡା, କୁଲଡିହା ସଂରକ୍ଷଣ ୨୭୨.୭୫ବର୍ଗ କି.ମି. ଜଙ୍ଗଲକୁ ନେଇ ଅଭୟାରଣ୍ୟ ଘୋଷଣା କରିଥିଲେ। ଏଠାରେ ହାତୀ, ବାଘ, ଭାଲୁ, ଗୟଳ, କୁଟାରୀ, ହରିଣ, ସମ୍ବର ଆଦି ବନ୍ୟଜନ୍ତୁ ସମେତ ବିଭିନ୍ନ ପ୍ରଜାତିର ରଙ୍ଗ ବେରଙ୍ଗର ଦେଶୀ ବିଦେଶୀ ପକ୍ଷୀ ଦେଖିବାକୁ ମିଳନ୍ତି। ଏହି ପ୍ରାକୃତିକ ପରିବେଶକୁ ଉପଭୋଗ କରିବା ପାଇଁ ଦେଶ ବିଦେଶରୁ ବହୁ ପର୍ଯ୍ୟଟକ ଏଠାକୁ ଆସିଥାନ୍ତି। ହେଲେ କିଛି ଦିନ ହେଲା ବନ୍ୟପ୍ରାଣୀ ଅସୁରକ୍ଷିତ ହୋଇପଡିଥିବା ନଜରକୁ ଆସିଛି। ନିକଟରେ ଦନ୍ତା ହାତୀର ମୃତ୍ୟୁ ଘଟିବା ଓ ତାର ଦାନ୍ତକୁ କାଢ଼ି ନିଆଯିବା ଭଳି ଘଟଣା ଘଟିଥିଲା। ଏହାର ରହସ୍ୟ ଆଜି ପର୍ଯ୍ୟନ୍ତ ବନବିଭାଗ ଖୋଜି ପାରି ନ ଥିବା ବେଳେ କୌଣସି ଶିକାରୀଙ୍କୁ ମଧ୍ୟ ଠାବ କରି ପାରିନାହିଁ।
