ନୂଆପଡା ଅଫିସ/ଖଡିଆଳ,୨ା୭: ଶିଶୁ, ମାତୃ ମୃତ୍ୟୁହାର କମାଇବାକୁ ସରକାର ବିଭିନ୍ନ ଯୋଜନା କାର୍ଯ୍ୟକାରୀ କରୁଛନ୍ତି । ଏଥିସକାଶେ ଆନୁଷ୍ଠାନିକ ପ୍ରସବ ଉପରେ ସ୍ବାସ୍ଥ୍ୟ ବିଭାଗ ଗୁରୁତ୍ୱ ଦେଉଛି । ହେଲେ ନୂଆପଡ଼ା ଜିଲା ସଦର ମହକୁମାଠାରୁ ୮୦ କି.ମି. ଦୂର ଦୁର୍ଗମ ପାହାଡ ମଧ୍ୟରେ ଥିବା ରାନିମୁଣ୍ଡା ଗ୍ରାମପଞ୍ଚାୟତ ସମାଡପଦର ଗାଁରେ ଏହି ଯୋଜନାର ବ୍ୟତିକ୍ରମ ଦେଖିବାକୁ ମିଳିଛି । ଏଠାକୁ ଜନନୀ ସୁରକ୍ଷା ଗାଡି ନ ପହଞ୍ଚତ୍ବାରୁ ଗର୍ଭବତୀ ମହିଳାଙ୍କୁ ଦୀର୍ଘ ୪ କି.ମି. ପଥ ଖଟିଆରେ ବୋହି ଆଣୁଥିବା ସମୟରେ ଏକ ଗଛମୂଳେ ଶିଶୁ କନ୍ୟାଙ୍କୁ ଜନ୍ମ ଦେଇଛନ୍ତି । ଏଭଳି ଘଟଣା ଜିଲାରେ ଚାଞ୍ଚଲ୍ୟ ସୃଷ୍ଟି କରିଛି ।
ଗାଁର ମୁକେଶ ମାଝି (୩୨)ଙ୍କ ସ୍ତ୍ରୀ ପ୍ରମିଳା(୨୭)ଙ୍କୁ ସୋମବାର ରାତିରେ ପ୍ରସବ ଯନ୍ତ୍ରଣା ହୋଇଥିଲା। ସେ ଜନନୀ ସୁରକ୍ଷା ଗାଡିକୁ ଯୋଗାଯୋଗ କରିଥିଲେ। ହେଲେ ଗାଡ଼ି ଆସିଲା ନାହିଁ । ନାଁ ଆଶା ନା ଅଙ୍ଗନୱାଡି କର୍ମୀଙ୍କ ମଧ୍ୟ ଦେଖା ମିଳି ନ ଥିଲା। ସକାଳ ଯାଏଁ ଅପେକ୍ଷା କରିବା ପରେ ୭/୮ଜଣ ଲୋକ ପ୍ରମିଳାଙ୍କୁ ଏକ ଖଟିଆରେ ଆବଡାଖାବଡା ରାସ୍ତାରେ ମୁଣ୍ଡ ଉପରେ ଛତା ଦେଇ ଦୀର୍ଘ ୪ କି.ମି. ଦୂର ବୋହି ଆଣିଥିଲେ । ପାହାଡ ତଳେ ଠିକ ପହଞ୍ଚତ୍ବାବେଳକୁ କନ୍ୟା ଶିଶୁଟି ଜନ୍ମ ନେଲା । ତଥାପି ସେଠାରେ ଦୀର୍ଘ ସମୟ ଅପେକ୍ଷା କରିବା ପରେ ମଧ୍ୟ ଗାଡି ନ ଆସିବାରୁ ବାଧ୍ୟ ହୋଇ ମା’ ଓ ଶିଶୁଙ୍କୁ ଗାଁକୁ ନେଇଯାଇଥିଲେ। ଏ ବିଷୟରେ ସିଡିଏମଓ ଡା.ଜ୍ୟୋତ୍ସ୍ନାରାଣୀ ପଟ୍ଟନାୟକଙ୍କୁ ପଚାରିବା ତାଙ୍କ ପାଖରେ ଏଭଳି ଖବର ନାହିଁ । ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ।
